بلاول بھٹو کی سابق آسٹرین شہزادی سے شادی کی افواہیں، پیپلزپارٹی کی تردید

تازہ ترین / / By

پاکستان پیپلز پارٹی کے چیئرمین اور سابق وزیرخارجہ بلاول بھٹو زرداری کی آسٹریا کے آخری شہنشاہ کی پڑپوتی سے شادی کی خبریں گردش کر رہی ہیں جبکہ میئر کراچی نے خبروں کو بے بنیاد قرار دیا ہے۔

قیاس آرائیوں کو اس وقت مزید تقویت ملی جب صدرِ مملکت آصف علی زرداری 7 روزہ نجی دورے پر آسٹریا پہنچےہیں۔

یہ بھی پڑھیں:چیئرمین پیپلز پارٹی بلاول بھٹو زرداری کا حکومت سے ہر قسم کا تعاون معطل کرنے کا بڑا اعلان

سماجی رابطے کی ویب سائٹ ایکس پر گردش کرنے والی ان خبروں کی اگرچہ اس اعلیٰ سطح کی شادی کی تاحال باضابطہ تصدیق نہیں ہو سکی لیکن پارٹی کارکنان حتمی خوشخبری کے منتظر ہیں۔

رپورٹس کے مطابق، امکان ظاہر کیا جا رہا ہے کہ یہ ہائی پروفائل شادی آسٹریا کے دارالحکومت ویانا میں انجام پائے گی۔

سوشل میڈیا پر گردش کرنے والی خبروں میں دعویٰ کیا جا رہا ہے کہ بلاول بھٹو مبینہ طور پر سابقہ آسٹرین آرک ڈچز گلوریا وان ہیبسبرگ سے رشتہِ ازدواج میں منسلک ہونے جا رہے ہیں۔

گلوریا آسٹریا کے آخری حکمران شہنشاہ چارلس اول کی پڑپوتی ہیں۔ اگر یہ بات سچ ثابت ہوتی ہے تو توقع کی جا رہی ہے کہ اس شاہانہ تقریب میں دنیا بھر سے معروف سماجی شخصیات اور نامور سیاسی رہنما شرکت کریں گے۔

ذرائع کے مطابق صدر مملکت آصف علی زرداری کا یہ دورہ 7 روز پر محیط ہے۔دوسری جانب سوشل میڈیا پر بلاول بھٹو زرداری کی ایک ویڈیو بھی تیزی سے وائرل ہو رہی ہے جو تقریباً 2 ماہ پرانی بتائی جاتی ہے، جس میں انہیں آسٹریا کی سڑکوں پر چہل قدمی کرتے ہوئے دیکھا جا سکتا ہے۔

صدرِ مملکت کی وہاں موجودگی اور بلاول بھٹو کی اس ویڈیو کے سامنے آنے کے بعد شادی کی افواہوں نے مزید زور پکڑ لیا ہے۔

واضح رہے کہ بلاول بھٹو زرداری کی شادی طویل عرصے سے پاکستانی سیاست، میڈیا اور عوام میں گہری دلچسپی کا موضوع رہی ہے۔

یہ بھی پڑھیں:بلاول بھٹو کو دال میں کالا نظر آرہا ہےتو اسے نکال کر باہر پھینک دینگے، رانا ثنااللہ

ماضی میں بھی ان کی شادی کے حوالے سے مختلف قیاس آرائیاں کی جاتی رہی ہیں، لیکن اس بار ویانا کے تناظر میں آنے والی خبروں نے ایک نیا رنگ اختیار کر لیا ہے۔

ادھر میئر کراچی نے خبروں پر ردعمل دیتے ہوئے انہیں بے بنیاد قرار دیدیا ہے۔مرتضیٰ وہاب نے کہا کہ چیئرمین پیپلز پارٹی کی منگنی یا شادی سے متعلق خبریں غلط اور بے بنیاد ہیں۔

Must Read