محکمہ ایلیمنٹری اینڈ سیکنڈری ایجوکیشن آزادکشمیر میں بڑے پیمانے پر ترقیاں دی گئی ہیں، جس سے درجنوں تعلیمی اداروں کو مستقل سربراہان میسر آ گئے ہیں۔
سیکرٹری ایلیمنٹری اینڈ سیکنڈری ایجوکیشن آزادکشمیر، جناب عنایت علی قاضی کی زیر صدارت سلیکشن بورڈ نمبر 3 کا ایک اہم اجلاس منعقد ہوا۔ اس اجلاس میں محکمہ تعلیم کے پچپن (55) سینئر مدرسین (مردانہ) کو ان کی بہترین کارکردگی اور سینیارٹی کی بنیاد پر گریڈ 17 (B-17) میں بطور صدر معلم (ہیڈ ماسٹر) ترقی دینے کی حتمی منظوری دے دی گئی ہے۔
یہ بھی پڑھیں: محکمہ صحت عامہ آزاد کشمیر: 118 ٹیکنیکل ملازمین کی اگلے سکیلز میں ترقی کا نوٹیفکیشن جاری
بروقت فیصلے کی ستائش اور انتظامی بہتری:
تعلیمی حلقوں کی جانب سے سیکرٹری تعلیم جناب عنایت علی قاضی کے اس اقدام کو بھرپور سراہا جا رہا ہے۔ بروقت سلیکشن بورڈ کے انعقاد سے جہاں ایک طرف طویل عرصے سے ترقی کے منتظر اساتذہ کو ان کا جائز حق ملا ہے، وہیں دوسری طرف ریاست کے وہ سرکاری تعلیمی ادارے جو مستقل سربراہان سے محروم تھے، اب وہاں باقاعدہ انتظامی نظم و نسق بہتر ہو سکے گا۔
مزید پڑھیں: ڈاکٹر آرزو فاطمہ کی ترقی خطے کے لیے باعثِ فخر، انمول ہسپتال لاہور میں ڈائریکٹر مقرر
تعلیمی ویژن اور داخلہ مہم کا عزم:
امید ظاہر کی جا رہی ہے کہ یہ نو ترقیاب صدر معلمین اپنی تمام تر پیشہ ورانہ استطاعت اور توانائیوں کو تعلیمی اداروں کی حالت زار بہتر بنانے کے لیے صرف کریں گے۔ ان ترقیوں کا بنیادی مقصد تعلیمی معیار کو بلند کرنا اور سیکرٹری تعلیم کے ویژن کے عین مطابق ریاست بھر میں جاری حالیہ داخلہ مہم کو بھرپور طریقے سے کامیاب بنانا ہے تاکہ سرکاری اسکولوں کا گراف بلند ہو سکے۔
