ایران کے سپریم لیڈر آیت اللہ سید مجتبیٰ خامنہ ای نے آبادی میں اضافے کے لیے مؤثر اقدامات کرنے پر زور دیتے ہوئےکہا ہے کہ ایران کی ایک بڑی اور بااثر طاقت کے طور پر حیثیت میں اضافہ براہِ راست اس کی آبادی میں اضافے سے جڑا ہوا ہے۔
ایرانی میڈیا کے مطابق قومی یوم آبادی کے موقع پر جاری ایک پیغام میں سپریم لیڈر مجتبیٰ خامنہ ای نے شرحِ پیدائش بڑھانے کی ضرورت پر روشنی ڈالی اور بچے پیدا کرنے کے رجحان کو فروغ دینے کی کوششیں تیز کرنے کا مطالبہ کیا۔
یہ بھی پڑھیں: حقوق سے دستبردار نہیں ہونگے، ایرانی سپریم لیڈر کا اہم پیغام جاری
ایرانی سپریم لیڈر نے آبادی کے شعبے میں کام کرنے والے کارکنوں کے اس خط کا جواب دیا جس میں ان کے والد آیت اللہ خامنہ ای کی شہادت پر تعزیت اور محبت کا اظہار کیا گیا تھا۔
مجتبیٰ خامنہ ای نے کہا کہ آبادی میں اضافے کی ضرورت کو کبھی کبھی صرف ماضی کی پالیسی کی خامیوں کی تلافی کے طور پر دیکھا جاتا ہے، تاہم اس کا ایک زیادہ اہم اسٹریٹجک پہلو بھی ہے۔
انہوں نے کہا کہ آبادی میں اضافے کی درست اور یقینی پالیسی پر عمل کرتے ہوئے، عظیم ایرانی قوم مستقبل میں بڑے کردار اور اسٹریٹجک کامیابیاں حاصل کرنے کے قابل ہو گی اور ایک نئی اسلامی ایرانی تہذیب کی تشکیل کی جانب بڑے قدم اٹھا سکے گی۔
انہوں نے کہا کہ مرحوم رہبر نے عوامی اور نجی حاضرین کے ساتھ ملاقاتوں اور خط و کتابت میں اس موضوع کو بہت اہمیت دی، اور یہ اسلامی نظام کے سب سے اہم اسٹریٹجک معاملات میں سے ایک ہے۔
ایرانی سپریم لیڈر نے آبادی کے شعبے میں کام کرنے والے عوامی کارکنوں کی تعریف کی اور انہیں اپنی کوششیں جاری رکھنے کی ترغیب دی۔
یہ بھی پڑھیں: ڈونلڈ ٹرمپ نے ایران پر حملے کی ایک اور ڈیڈلائن دیدی
مجتبیٰ خامنہ ای نے کہا کہ آبادی کے شعبے میں عوامی کارکنوں کی بڑھتی ہوئی کوششیں اور بچوں کی پیدائش کے رجحان کو فروغ دینا روشن مستقبل کے حصول میں نمایاں اثر ڈال سکتا ہے۔
انہوں نے کہا کہ ایرانی قوم کی طاقت کا تسلسل براہِ راست آبادی کے بڑھنے سے وابستہ ہے۔
