محکمۂ موسمیات نے ملک کے مختلف علاقوں میں آج تیز ہواؤں، آندھی اور گرج چمک کے ساتھ بارش کی پیش گوئی کرتے ہوئے شہریوں کو احتیاط برتنے کی ہدایت کی ہے۔ اس الرٹ کے مطابق اسلام آباد اور گردونواح میں دن کے اوقات میں موسم گرم رہے گا، تاہم دوپہر کے بعد مطلع جزوی طور پر ابر آلود ہونے، تیز ہوائیں چلنے اور گرج چمک کے ساتھ بارش کا امکان ظاہر کیا گیا ہے۔
آزاد کشمیر اور گلگت بلتستان کی صورتحال:
محکمۂ موسمیات کے مطابق آزاد کشمیر اور گلگت بلتستان میں مطلع ابر آلود رہنے اور تیز ہوائیں چلنے کا امکان ہے۔ ان علاقوں میں گرج چمک کے ساتھ بارش اور بعض مقامات پر موسلادھار بارش کی بھی پیش گوئی کی گئی ہے، جس کے باعث مقامی شہریوں کو محتاط رہنے کی ہدایت کی گئی ہے۔
خیبرپختونخوا میں بارش کے مقامات:
صوبہ خیبرپختونخوا کے بیشتر اضلاع میں موسم گرم اور مرطوب رہے گا، تاہم دیر، سوات، کوہستان، شانگلہ، بٹگرام، بونیر، کوہاٹ، کرم، باجوڑ، مہمند، خیبر، اورکزئی، مانسہرہ، ایبٹ آباد، پشاور، مردان، نوشہرہ، صوابی، بنوں، ہنگو، ٹانک، وزیرستان اور ڈیرہ اسماعیل خان میں چند مقامات پر آندھی، تیز ہواؤں اور گرج چمک کے ساتھ بارش متوقع ہے۔
یہ بھی پڑھیں: آزادکشمیر: آندھی، گرج چمک کیساتھ بارش کا امکان، محکمہ موسمیات
پنجاب کے مختلف اضلاع کا احوال:
پنجاب کے بیشتر اضلاع میں بھی موسم گرم اور مرطوب رہنے کی توقع ہے، تاہم راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیرآباد، فیصل آباد، خوشاب، سرگودھا، لاہور، شیخوپورہ، سیالکوٹ، نارووال، اوکاڑہ اور قصور میں چند مقامات پر بارش کا امکان ہے۔ شام اور رات کے اوقات میں ساہیوال، نورپور تھل، بھکر، لیہ، میانوالی، پاکپتن، بہاولنگر، ڈیرہ غازی خان اور بہاولپور میں بھی آندھی اور گرج چمک کے ساتھ بارش متوقع ہے۔
اور پڑھیں: حریت رہنما برہان وانی کا دسواں یومِ شہادت عقیدت و احترام کے ساتھ منایا گیا
بلوچستان اور سندھ کا موسم:
بلوچستان کے بیشتر اضلاع میں موسم گرم جبکہ وسطی علاقوں میں شدید گرم رہنے کا امکان ہے، تاہم شام اور رات کے دوران ژوب، بارکھان، موسیٰ خیل، سبی، کوہلو، خضدار، آواران اور گردونواح میں تیز ہواؤں اور گرج چمک کے ساتھ بارش ہو سکتی ہے۔ دوسری جانب سندھ کے بیشتر اضلاع میں موسم گرم اور حبس برقرار رہنے کا امکان ہے، جبکہ ساحلی علاقوں میں مطلع جزوی ابر آلود رہے گا۔ دادو، تھرپارکر اور گردونواح میں گرج چمک کے ساتھ بارش کی پیش گوئی کی گئی ہے۔
ریکارڈ کیا گیا درجہ حرارت:
محکمۂ موسمیات کے مطابق آج ملک میں سب سے زیادہ درجہ حرارت تربت میں 49 ڈگری سینٹی گریڈ ریکارڈ کیا گیا، جبکہ سبی میں 47، دالبندین میں 45 اور روہڑی، اوکاڑہ، سکھر اور دادو میں 44 ڈگری سینٹی گریڈ ریکارڈ کیا گیا ہے۔
