مظفرآباد:آزاد جموں و کشمیر کے وزیراعظم فیصل ممتاز راٹھور سے چیف سیکرٹری خوشحال خان اور انسپکٹر جنرل پولیس (آئی جی پی) لیاقت علی ملک نے الگ الگ اہم ملاقاتیں کی ہیں۔ ان ملاقاتوں میں ریاست بھر میں امن و امان کی مجموعی صورتحال، انتظامی امور اور عوامی فلاح و بہبود کے منصوبوں پر تفصیلی تبادلہ خیال کیا گیا۔
تفصیلات کے مطابق، وزیراعظم ہاؤس مظفرآباد میں ہونے والی ان اہم بیٹھکوں میں چیف سیکرٹری خوشحال خان نے وزیراعظم فیصل ممتاز راٹھور کو آزاد کشمیر کے تمام اضلاع میں جاری انتظامی معاملات، سرکاری محکموں کی کارکردگی اور عوامی مسائل کے حل کے لیے کیے جانے والے اقدامات سے تفصیلی طور پر آگاہ کیا۔
یہ بھی پڑھیں: راولا کوٹ دھرنے پر شیلنگ اور فائرنگ کے دعوے جھوٹے، کوئی کارروائی نہیں کی گئی: ترجمان آئی جی پولیس
آئی جی پولیس کی امن و امان اور عوامی تحفظ پر بریفنگ:
دوسری جانب، آئی جی پی لیاقت علی ملک نے وزیراعظم سے ملاقات کے دوران ریاست میں سیکیورٹی کی مجموعی صورتحال، پولیس کی پیشہ ورانہ استعداد کار میں اضافے اور عوام کے جان و مال کے تحفظ کے لیے اٹھائے گئے حالیہ ٹھوس اقدامات پر جامع بریفنگ دی۔ آئی جی پولیس نے عزم ظاہر کیا کہ شہریوں کے تحفظ اور امن عامہ کو برقرار رکھنے کے لیے پولیس فورس ہمہ وقت مستعد ہے۔
قانون کی بالادستی پر کوئی سمجھوتہ نہیں ہو گا: وزیراعظم آزاد کشمیر
وزیراعظم فیصل ممتاز راٹھور نے انتظامیہ اور پولیس کی اب تک کی مجموعی کارکردگی کو سراہتے ہوئے حکام کو ہدایات جاری کیں۔ انہوں نے اس عزم کا اعادہ کیا کہ ریاست میں قانون کی بالادستی کو ہر صورت برقرار رکھا جائے گا اور عوام کے جان و مال کا تحفظ مزید مؤثر بنایا جائے گا۔ وزیراعظم کا کہنا تھا کہ شہریوں کو ایک پرامن اور محفوظ ماحول فراہم کرنا حکومت کی اولین ترجیح ہے اور اس مقصد کے حصول کے لیے تمام انتظامی و سیکیورٹی ادارے مل کر کام کرتے رہیں گے۔
