پاکستان تحریک انصاف (پی ٹی آئی) کے عبوری چیئرمین بیرسٹر گوہر علی خان نے بدھ کے روز واضح کیا ہے کہ پارٹی نے آزاد جموں و کشمیر کے آئندہ انتخابات کا بائیکاٹ کرنے کا تاحال کوئی فیصلہ نہیں کیا ہے۔
پشاور ہائی کورٹ کے احاطے میں میڈیا نمائندوں سے گفتگو کرتے ہوئے انہوں نے کہا کہ سوشل میڈیا پر پی ٹی آئی کی جانب سے انتخابات کے بائیکاٹ کے حوالے سے جو نوٹیفکیشن گردش کر رہا ہے، وہ مکمل طور پر جعلی ہے۔
یہ بھی پڑھیں: پی ٹی آئی رجسٹریشن کیس میں بڑی پیش رفت: آزاد کشمیر سپریم کورٹ نے ہائیکورٹ کا فیصلہ معطل کر دیا
بیرسٹر گوہر خان نے کہا کہ تحریک انصاف آزاد کشمیر کی صورتحال پر گہری نظر رکھے ہوئے ہے اور پارٹی اگلے دو دنوں میں آزاد جموں و کشمیر کے آئندہ انتخابات کے بارے میں فیصلہ کرے گی۔ انہوں نے مصالحت کو موقع دینے کی ضرورت پر زور دیتے ہوئے کہا کہ اگر کشمیر کے لوگ اپنے مطالبات اور شکایات پر احتجاج کر رہے ہیں تو یہ احتجاج پرامن رہنا چاہیے۔ انہوں نے حکومت سے بھی مطالبہ کیا کہ وہ خون خرابے سے گریز کرے اور عوام کو پرامن احتجاج کرنے کی اجازت دے۔
اپنے بیان میں انہوں نے انتخابی نشان کے حوالے سے بات کرتے ہوئے کہا کہ پی ٹی آئی کا انتخابی نشان بغیر کسی جواز کے چھینا گیا ہے۔ ہری پور، گلگت بلتستان اور آزاد کشمیر میں پارٹی کا انتخابی نشان کھونے کی وجہ سے تحریک انصاف کے لیے بہت سے مسائل اور مشکلات پیدا ہوئیں۔
