بہاولپور: چیف آف ڈیفنس فورسز اور فیلڈ مارشل سید عاصم منیرنے بہاولپور گیریژن کا دورہ کیا، جسے ملکی دفاعی تیاریوں کے تناظر میں انتہائی اہم قرار دیا جا رہا ہے۔
پاک فوج کے شعبہ تعلقات عامہ آئی ایس پی آر کے مطابق دورے کا مقصد آپریشنل تیاریوں، تربیتی سرگرمیوں اور انتظامی امور کا جائزہ لینا تھا۔ فیلڈ مارشل سید عاصم منیر کو بہاولپور گیریژن میں موجود فارمیشنز کی مجموعی آپریشنل تیاری، تربیتی معیار اور انتظامی نظم و ضبط سے متعلق تفصیلی بریفنگ دی گئی۔ بریفنگ میں موجودہ اور مستقبل کے سیکیورٹی چیلنجز کے تناظر میں افواج پاکستان کی تیاریوں پر روشنی ڈالی گئی۔
ملٹی ڈومین وارفیئر پر خصوصی توجہ:
بریفنگ کے دوران ملٹی ڈومین وارفیئر کی تیاریوں پر خصوصی توجہ دی گئی، جس میں زمینی، فضائی، سائبر اور الیکٹرانک وارفیئر کے مختلف پہلو شامل تھے۔ فیلڈ مارشل کو بتایا گیا کہ افواج پاکستان بدلتی ہوئی جنگی نوعیت کے مطابق اپنی حکمت عملی، تربیت اور صلاحیتوں کو مسلسل جدید بنا رہی ہیں۔
یہ بھی پڑھیں: دستخطی تقریب، صدرٹرمپ کا فیلڈ مارشل کی طرف اشارہ، مسکراہٹ کیساتھ خیر مقدم
فیلڈ مشق اسٹیڈ فاسٹ ریزولو کا مشاہدہ:
فیلڈ مارشل نے خیرپور ٹامیوالی میں منعقدہ فیلڈ مشق اسٹیڈ فاسٹ ریزولو کا مشاہدہ کیا، جس میں بغیر پائلٹ فضائی نظام، ڈرونز، جدید نگرانی کے آلات، الیکٹرانک وارفیئر اور جدید کمانڈ اینڈ کنٹرول سسٹمز کا عملی استعمال دکھایا گیا۔ مشق کا مقصد جدید جنگی ماحول میں فوجی یونٹس کی ہم آہنگی، فوری ردعمل اور ٹیکنالوجی کے مؤثر استعمال کو جانچنا تھا۔
افواج سے خطاب اور دفاع وطن کا عزم:
افواج سے خطاب کرتے ہوئے فیلڈ مارشل سید عاصم منیر نے کہا کہ مسلح افواج پاکستان ملک کی سالمیت، خودمختاری اور علاقائی حدود کے دفاع کے لیے مکمل طور پر تیار ہیں اور کسی بھی چیلنج کا بھرپور جواب دینے کی صلاحیت رکھتی ہیں۔ انہوں نے نوجوان افسران اور جوانوں کے بلند حوصلے اور پیشہ ورانہ مہارتوں کو قابل ستائش قرار دیا اور کہا کہ جدید ٹیکنالوجی مستقبل کی جنگی حکمت عملی میں مرکزی کردار ادا کرے گی۔
یہ بھی پڑھیں: ورلڈ اکنامک فورم میں وزیراعظم اور فیلڈ مارشل عالمی رہنماؤں کی توجہ کا مرکز بن گئے
فیلڈ مارشل نے مزید کہا کہ افواج پاکستان تیزی سے جدید ٹیکنالوجی کو اپنا رہی ہیں اور جدت، مقامی تیاری اور منفرد صلاحیتوں کی ترقی پر خصوصی توجہ دی جا رہی ہے۔ انہوں نے واضح کیا کہ بدلتے ہوئے عالمی اور علاقائی حالات میں مطابقت اور ٹیکنالوجی میں برتری کامیابی کی ضمانت ہے۔ آخر میں انہوں نے وطن عزیز کی سرحدوں کے دفاع کے عزم کا اعادہ کیا اور کہا کہ افواج پاکستان قومی سلامتی کے تحفظ کے لیے ہر وقت تیار رہیں گی۔
