لندن: برطانوی ایئرلائن کے ایک مسافر طیارے کو اس وقت غیر معمولی صورتحال کا سامنا کرنا پڑا جب ٹیک آف کے فوراً بعد طیارے کا پہیہ نیچے گر گیا، تاہم پائلٹ نے پیشہ ورانہ مہارت کا مظاہرہ کرتے ہوئے پرواز کو بحفاظت لندن پہنچا دیا۔
برطانوی میڈیا رپورٹس کے مطابق برٹش ایئرویز کا یہ طیارہ امریکی شہر لاس ویگاس سے لندن ہیتھرو ایئرپورٹ کے لیے روانہ ہوا تھا۔ اڑان بھرنے کے کچھ ہی دیر بعد طیارے کے مین لینڈنگ گیئر سے دائیں جانب پچھلا پہیہ علیحدہ ہو کر نیچے گر گیا۔ واقعے کی ویڈیو کلپ میں واضح طور پر دیکھا جا سکتا ہے کہ پہیہ جہاز سے الگ ہو کر زمین کی جانب گرتا ہے، تاہم اس کے باوجود طیارے نے اپنی پرواز جاری رکھی۔
یہ بھی پڑھیں: بھارتی فضائیہ کا تربیتی طیارہ پریاگ راج میں تالاب میں گر کر تباہ
رپورٹس کے مطابق طیارے نے لاس ویگاس کے ہیری ریڈ انٹرنیشنل ایئرپورٹ سے رات 9 بج کر 10 منٹ پر اڑان بھری تھی۔ پہیہ گرنے کے باوجود پائلٹ نے صورتحال کو کنٹرول میں رکھا اور طے شدہ روٹ کے مطابق پرواز جاری رکھنے کا فیصلہ کیا۔ فلائٹ ریڈار نے بھی اس بات کی تصدیق کی کہ لاس ویگاس میں زمین پر اس واقعے کے نتیجے میں کوئی شخص زخمی نہیں ہوا۔
طیارہ تقریباً 9 گھنٹے اور 17 منٹ فضا میں رہنے کے بعد لندن ہیتھرو ایئرپورٹ پر اترا، جہاں اسے “محفوظ اور غیر معمولی لینڈنگ” قرار دیا گیا۔ حیران کن طور پر پرواز مقررہ وقت سے 27 منٹ قبل ہی لندن پہنچ گئی، جسے ایوی ایشن ماہرین پائلٹ کی مہارت اور عملے کی تیاری کا نتیجہ قرار دے رہے ہیں۔
مزید پڑھیں: بھارت میں طیارے کی کریش لینڈنگ، مہاراشٹرا کے نائب وزیراعلیٰ سمیت پانچ افراد ہلاک
تاحال یہ واضح نہیں ہو سکا کہ طیارے کا پہیہ گرنے کی اصل وجہ کیا تھی۔ برٹش ایئرویز اور متعلقہ ایوی ایشن حکام کی جانب سے واقعے کی مکمل تحقیقات جاری ہیں تاکہ مستقبل میں ایسے واقعات سے بچاؤ کو یقینی بنایا جا سکے۔
واقعے سے متعلق سی این اے کے سوالات کے جواب میں برٹش ایئرویز کے ترجمان نے کہا:
“حفاظت اور سلامتی ہمارے ہر کام کو اہمیت دیتی ہے اور ہم حکام کی تحقیقات میں مدد کر رہے ہیں”۔
یہ واقعہ اگرچہ سنگین نوعیت کا تھا، تاہم کسی جانی نقصان کے بغیر پرواز کا بحفاظت مکمل ہونا ایئرلائن انڈسٹری میں حفاظتی نظام اور عملے کی پیشہ ورانہ صلاحیتوں کا عملی ثبوت ہے۔
