اسلام آباد: محکمہ موسمیات نے ملک کے مختلف حصوں میں تیز ہواؤں، گرج چمک کے ساتھ بارش اور بالائی علاقوں میں برفباری کی پیشگوئی کر دی ہے۔ رپورٹ کے مطابق بالائی خیبرپختونخوا، شمال مشرقی پنجاب، خطہ پوٹھوہار، اسلام آباد، گلگت بلتستان اور کشمیر میں مطلع ابر آلود رہنے کے ساتھ تیز ہواؤں اور گرج چمک کے ساتھ بارش اور پہاڑوں پر برفباری کا امکان ہے۔
محکمہ موسمیات کے مطابق اس دوران بالائی خیبرپختونخوا، شمال مشرقی پنجاب اور خطہ پوٹھوہار میں چند مقامات پر ژالہ باری بھی ہوسکتی ہے، جبکہ ملک کے وسطی اور جنوبی علاقوں میں موسم خشک رہنے کی توقع ظاہر کی گئی ہے۔
ادارے نے خبردار کیا ہے کہ ملک کے بالائی علاقوں میں پہاڑوں پر برفباری اور لینڈ سلائیڈنگ کے امکانات موجود ہیں، جب کہ ژالہ باری اور گرج چمک کے باعث کمزور انفراسٹرکچر کو نقصان پہنچنے کا خدشہ ہے۔
اسلام آباد اور اس کے گرد و نواح میں گرج چمک کے ساتھ بارش کا امکان ظاہر کیا گیا ہے۔ راولپنڈی، اٹک، جہلم، منگلا، چکوال، تلہ گنگ، میانوالی، خوشاب، سرگودھا، وزیرآباد، گوجرانوالہ، گجرات، سیالکوٹ، لاہور، نارووال، قصور اور شیخوپورہ سمیت قریبی علاقوں میں بھی بارش متوقع ہے۔
یہ بھی پڑھیں: اٹلی: برفانی تودے کی زد میں آکر خاتون سمیت 5 جرمن کوہ پیما ہلاک
اسی طرح محکمہ موسمیات نے بتایا کہ خیبرپختونخوا کے اضلاع چترال، دیر، سوات، کوہستان، مالم جبہ، کالام، ایبٹ آباد، پشاور، مانسہرہ، ہری پور، بٹگرام، صوابی، مردان، نوشہرہ، چارسدہ، کوہاٹ، ہنگو، کرک، باجوڑ، خیبر، اورکزئی اور کرم میں بھی بارش ہونے کی توقع ہے، جبکہ وزیرستان میں چند مقامات پر تیز ہواؤں اور گرج چمک کے ساتھ بارش کا امکان ظاہر کیا گیا ہے۔
یہ بھی پڑھیں: آزادکشمیر، گلگت بلتستان کے پہاڑوں پر برفباری، این ڈی ایم اے کی بڑی پیشگوئی
دوسری جانب سندھ اور بلوچستان کے بیشتر اضلاع میں موسم خشک اور سرد رہنے کا امکان ہے۔ گلگت بلتستان میں تیز ہواؤں اور گرج چمک کے ساتھ بارش جبکہ آزاد کشمیر میں بارش اور پہاڑوں پر برفباری کی پیشگوئی کی گئی ہے۔
گزشتہ 24 گھنٹوں کے دوران ملک کے بیشتر علاقوں میں موسم خشک جبکہ پہاڑی علاقوں میں سرد رہا، جبکہ پنجاب کے مختلف اضلاع سموگ کی لپیٹ میں رہے۔
