وزیراعظم آزاد حکومت ریاست جموں و کشمیر افتخار گیلانی کی زیر صدارت محکمہ ان لینڈ ریونیو کا ایک اہم اجلاس منعقد ہوا جس میں مقررہ ریونیو اہداف کے حصول اور ٹیکس نیٹ میں توسیع سمیت دیگر انتظامی امور کا تفصیلی جائزہ لیا گیا۔ اجلاس میں پرنسپل سیکرٹری سردار عدنان خورشید، سیکرٹری ان لینڈ ریونیو یونس میر، کمشنر ان لینڈ ریونیو باصل صدیق، سیکرٹری سی بی آر ڈاکٹر شازیہ اور انصل حمید سمیت دیگر متعلقہ اعلیٰ حکام نے شرکت کی۔
اجلاس کے دوران سیکرٹری ان لینڈ ریونیو نے وزیراعظم آزاد کشمیر کو محکمانہ کارکردگی، ریونیو وصولیوں اور آئندہ کے مقررہ اہداف پر تفصیلی بریفنگ دی۔ وزیراعظم افتخار گیلانی نے بریفنگ کا جائزہ لیتے ہوئے ہدایت کی کہ محکمہ مقررہ ریونیو اہداف کے حصول کے لیے مؤثر اور عملی حکمت عملی اختیار کرے اور محصولات کی وصولی کے پورے نظام کو مزید فعال و بہتر بنائے۔
ٹیکس نیٹ میں توسیع اور عوام دوست نظام کی تشکیل
وزیراعظم آزاد کشمیر نے اس بات پر زور دیا کہ ریاستی وسائل میں اضافے اور خطے کے مالی استحکام کے لیے ریونیو وصولیوں میں بہتری ناگزیر ہے، اور اس مقصد کے لیے ٹیکس دہندگان کو زیادہ سے زیادہ سہولیات فراہم کرنا بھی ضروری ہے۔ انہوں نے حکام کو واضح ہدایت کی کہ ٹیکس نیٹ کو وسیع کیا جائے جبکہ ٹیکس کے نظام کو آسان، شفاف اور عوام دوست بنایا جائے تاکہ شہریوں اور کاروباری افراد کو ادائیگی کے دوران غیر ضروری مشکلات کا سامنا نہ کرنا پڑے۔
یہ بھی پڑھیں: وزیراعظم آزاد کشمیر سے ورلڈ کشمیر فورم کے وفد کی ملاقات، سیاحت اور سرمایہ کاری پر گفتگو
عدالتی مقدمات کی پیروی اور انتظامی مسائل کا حل
وزیراعظم نے متعلقہ حکام کو ہدایت کی کہ ٹیکس امور میں شفافیت، مؤثر نگرانی اور انتظامی کارکردگی کو مزید بہتر بنایا جائے۔ انہوں نے ان لینڈ ریونیو سے متعلق عدالتوں میں زیرِ سماعت مقدمات کی مؤثر اور بروقت پیروی یقینی بنانے کی بھی خاص ہدایت کی۔ وزیراعظم افتخار گیلانی نے کہا کہ ریونیو اہداف کے حصول کے لیے باقاعدگی سے پیش رفت کا جائزہ لیا جائے اور اس کے لیے باقاعدہ مانیٹرنگ کا نظام وضع کیا جائے۔ اس موقع پر انہوں نے محکمہ ان لینڈ ریونیو میں درپیش مکانیت (عمارت و جگہ) کے مسائل کو ترجیحی بنیادوں پر حل کرنے کی یقین دہانی بھی کروائی۔
