مظفرآباد: آزاد جموں و کشمیر کے عام انتخابات 2026 کے سیاسی منظر نامے میں اس وقت شدید سنسنی پھیل گئی جب ہائی کورٹ آزاد جموں و کشمیر نے قائم مقام صدرِ ریاست و سپیکر قانون ساز اسمبلی، چوہدری لطیف اکبر کے بطور امیدوارِ اسمبلی کاغذاتِ نامزدگی کی منظوری کے خلاف دائر درخواست پر فریقین کو باقاعدہ نوٹس جاری کرتے ہوئے جواب طلب کر لیا۔
تفصیلات کے مطابق، عدالتِ عالیہ میں دائر کی گئی اس اہم آئینی و قانونی درخواست میں الیکشن کمیشن آزاد جموں و کشمیر کے اس فیصلے کو چیلنج کیا گیا ہے جس کے تحت چوہدری لطیف اکبر کے کاغذاتِ نامزدگی کو درست قرار دے کر منظور کیا گیا تھا۔
یہ بھی پڑھیں: چوہدری لطیف اکبر کے کاغذاتِ نامزدگی کی منظوری آزاد کشمیر ہائی کورٹ میں چیلنج
ہائی کورٹ آزاد کشمیر نے درخواست پر ابتدائی سماعت کے بعد الیکشن کمیشن سمیت تمام متعلقہ فریقین کو نوٹسز جاری کر دیے ہیں اور کیس کی آئندہ سماعت 20 جولائی مقرر کر دی ہے۔ عدالتِ عالیہ آئندہ مقررہ سماعت پر تمام فریقین کے تفصیلی دلائل سننے کے بعد اس درخواست کے قابلِ سماعت ہونے یا نہ ہونے اور دیگر اہم قانونی نکات پر مزید کارروائی کا فیصلہ کرے گی۔ قانونی ماہرین کے مطابق، 20 جولائی کی سماعت حلقہ ایل اے-30 مظفرآباد کے انتخابی معرکے کے لیے انتہائی فیصلہ کن ثابت ہوگی۔
لطیف اکبر کے کاغذاتِ نامزدگی چیلنج، ہائی کورٹ نے فریقین کو نوٹس جاری کر دیے۔ pic.twitter.com/mS1qZauXWn
— Kashmir Digital (@KashmirDigital1) July 9, 2026
