فیفا فٹبال ورلڈ کپ 2026 کے پری کوارٹر فائنل مرحلے میں بیلجیئم نے امریکا کو بدترین شکست دے کر کوارٹر فائنل کے لیے کوالیفائی کر لیا ہے جبکہ امریکی ٹیم اس ہار کے بعد ٹورنامنٹ کی دوڑ سے باہر ہو گئی ہے۔ سیٹل میں کھیلے گئے اس اہم اور سنسنی خیز پری کوارٹر فائنل میچ میں بیلجیئم نے امریکی ٹیم کو ایک کے مقابلے میں 4 گول سے عبرت ناک شکست سے دوچار کیا۔
تماشائیوں سے کھچا کھچ بھرے اسٹیڈیم میں امریکی فٹبال ٹیم ہائی مورال اور اپنے ریڈ کارڈ دکھائے جانے والے کھلاڑی بیلوگن کے ساتھ میدان میں اتری۔ میچ کے آغاز میں ہی 9ویں منٹ کے دوران بیلجیئم کی جانب سے ڈی کیٹالاری نے بہترین گول کیا لیکن اس گول نے بھی امریکی کھلاڑیوں کے حوصلے پست نہیں ہونے دیے۔ کھیل کے 31ویں منٹ میں امریکی کھلاڑی ٹلمین نے شاندار گول کر کے مقابلہ ایک ایک سے برابر کردیا۔
بیلجیئم کی پوزیشن مستحکم:
امریکی ٹیم ابھی اس گول کا جشن پوری طرح منا بھی نہیں سکی تھی کہ بیلجیئم نے دوسرا گول داغ دیا، میچ کے 33ویں منٹ میں ڈی کیٹالاری نے ایک بار پھر گیند کو امریکن جال کی راہ دکھائی۔ ہاف ٹائم کے اختتام پر میچ کا مقابلہ 1-2 سے بیلجیئم کے حق میں رہا۔
یہ بھی پڑھیں: رونالڈو کا خواب ادھورا رہ گیا،اسپین نے پرتگال کو ورلڈکپ سے باہر کردیا
امریکی حملے اور گول کیپر کا دفاع:
دوسرا ہاف شروع ہونے کے محض 12 منٹ بعد ہی بیلجیئم کے کھلاڑی وینا کین نے امریکی گول کیپر کی ایک فاش غلطی کا بھرپور فائدہ اٹھاتے ہوئے ٹیم کے لیے تیسرا گول اسکور کر دیا۔ 1-3 سے خسارے میں جانے کے باوجود امریکی ٹیم کے حملوں میں کوئی کمی نہیں آئی اور ان کے کھلاڑی مستقل طور پر اس خسارے کو پورا کرنے کی کوششوں میں مصروف رہے، مگر وہ کھیل کے ایک بہترین گول کیپر میں سے ایک، بیلجیئم کے کورٹووا کے مضبوط دفاع کو توڑنے میں بری طرح ناکام رہے۔
لوکاکو کا آخری گول اور میچ کا اختتام:
امریکی ٹیم کی رہی سہی کسر ان کے تجربہ کار کھلاڑی لوکاکو نے انجری ٹائم میں بیلجیئم کے لیے چوتھا گول کر کے پوری کر دی، جس کے ساتھ ہی بیلجیئم نے امریکا کو 1-4 سے شکست دے کر کوارٹر فائنل کے لیے جگہ پکی کر لی۔ اس میچ میں ٹرمپ کا ٹرمپ کارڈ اور فیفا کا فیصلہ بھی امریکا کو فتح نہ دلوا سکا۔
ریڈ کارڈ کا تنازع اور بدلہ:
بیلجیئم نے امریکا کو ایونٹ سے کک آؤٹ کرنے کے ساتھ ہی امریکی صدر کی سفارش پر امریکی ٹیم کے کھلاڑی بیلوگن کے ریڈ کارڈ کی معطلی کا فیصلہ واپس لیے جانے اور اپنی اپیل مسترد کیے جانے کا بدلہ بھی لے لیا۔ خیال رہے کہ 2 جولائی کو فیفا ورلڈکپ کے راؤنڈ آف 32 میں شریک میزبان امریکا کے فٹبالر بالوگن کو بوسنیا ہرزگوینا کے خلاف میچ میں ریڈ کارڈ دکھایا گیا تھا اور فیفا کے قانون کے تحت انہیں ایک میچ کے لیے معطل کیا گیا تھا۔ راؤنڈ آف 16 میں 7 جولائی کو امریکی ٹیم کے بیلجیئم سے میچ سے قبل امریکی صدر ٹرمپ کی سفارش پر فیفا نے بالوگن کی معطلی ختم کر دی تھی جس کے بعد ایک بڑا تنازع کھڑا ہو گیا تھا۔
