آزاد جموں و کشمیر کے دارالحکومت مظفرآباد کے انتخابی حلقہ کھاوڑہ سے مسلم لیگ (ن) کے حق میں ایک بہت بڑی اور حتمی سیاسی پیش رفت سامنے آئی ہے، جہاں ن لیگ کے رہنما راجہ ثاقب مجید کے طوفانی دوروں نے پاکستان پیپلز پارٹی کو اس کے سیاسی گڑھ میں شدید ٹف ٹائم دے دیا ہے۔ انتخابی مہم کے دوران حلقہ کھاوڑہ کے علاقے ’میرا جانکی‘ کے عوام نے بالآخر اپنا حتمی سیاسی فیصلہ سناتے ہوئے دہائیوں پر محیط پیپلز پارٹی سے وابستگی کو ہمیشہ کے لیے خیرآباد کہہ دیا ہے، جس سے حلقے کی سیاسی صورتحال یکسر تبدیل ہو کر رہ گئی ہے۔
اہلِ علاقہ اور مسلم لیگ (ن) میں شامل ہونے والے درجنوں افراد کا کہنا ہے کہ انہوں نے تقریباً 40 سال تک مسلسل پاکستان پیپلز پارٹی کا ساتھ دیا، ہر الیکشن میں ووٹ دیے، پولنگ اسٹیشن جتوائے اور ہر مشکل و کٹھن وقت میں جماعت کے ساتھ چٹان کی طرح کھڑے رہے۔ مگر اس طویل ترین عرصے اور بے لوث قربانیوں کے باوجود ان کے علاقے کو بنیادی ترین سہولیات سے دانستہ طور پر محروم رکھا گیا، جس نے انہیں یہ انتہائی قدم اٹھانے پر مجبور کیا۔
یہ بھی پڑھیں: چوہدری لطیف اکبر کے کاغذاتِ نامزدگی کی منظوری آزاد کشمیر ہائی کورٹ میں چیلنج
40 سالہ محرومی، خراب راستے اور ن لیگ پر اعتماد کا اظہار:
میرا جانکی کے لوگوں نے شدید مایوسی کا اظہار کرتے ہوئے بتایا کہ شدید بارشوں اور خراب راستوں کے باعث وہ آج کے دور میں بھی سودا سلف اپنے کندھوں پر اٹھانے پر مجبور ہیں، جبکہ ایمرجنسی کی صورت میں بیماروں کو چارپائیوں پر ڈال کر کئی کلومیٹر دور ہسپتال تک پہنچایا جاتا ہے۔ ان کا کہنا ہے کہ اتنی طویل حمایت کے باوجود ان کے گاؤں کو ایک انچ پختہ سڑک تک نصیب نہ ہو سکی، جبکہ دوسری طرف وہ قریبی علاقے جہاں پیپلز پارٹی کو بہت کم عوامی حمایت ملی تھی، وہاں نہ صرف ترقیاتی کام ہوتے رہے بلکہ سڑکیں بھی بنیں، جس سے میرا جانکی کے عوام میں احساسِ محرومی اور غصہ بڑھتا گیا۔
اسی شدید احساسِ محرومی کے پس منظر میں میرا جانکی کی ایک بہت بڑی تعداد نے اس بار روایتی سیاست کو مسترد کرتے ہوئے راجہ ثاقب مجید کی متحرک قیادت پر بھرپور اعتماد کا اظہار کیا اور باقاعدہ طور پر پاکستان مسلم لیگ (ن) میں شمولیت اختیار کر لی۔ ن لیگ میں شامل ہونے والے رہنماؤں اور بزرگوں کا کہنا ہے کہ پیپلز پارٹی چھوڑنے کا یہ بڑا فیصلہ کسی ذاتی مفاد یا لالچ کے لیے نہیں، بلکہ خالصتاً اپنے علاقے کے حق، حقیقی ترقی، پختہ سڑکوں کی تعمیر اور اپنی آنے والی نسلوں کے بہتر مستقبل کے لیے کیا گیا ہے۔
وعدے نہیں اب ترقی چلے گی: میرا جانکی کا واضح پیغام:
مسلم لیگ (ن) میں شمولیت کے اس بڑے پروگرام کے موقع پر میرا جانکی کے عوام نے سیاسی جماعتوں کو ایک واضح اور دوٹوک پیغام دیتے ہوئے کہا ہے کہ اب ووٹ صرف کھوکھلے وعدوں اور دعووں پر نہیں، بلکہ صرف اور صرف زمین پر نظر آنے والی ترقی، عوامی خدمت اور عملی کام کی بنیاد پر ملے گا۔
مزید پڑھیں: چوہدری انوار الحق کے کاغذاتِ نامزدگی کی منظوری ہائی کورٹ میں چیلنج، رٹ پٹیشن سماعت کے لیے منظور
عوام نے اس امید کا اظہار کیا ہے کہ راجہ ثاقب مجید کی قیادت میں آنے والے وقت میں ان کے علاقے کی دہائیوں پرانی محرومیوں کا ازالہ ممکن ہو سکے گا اور انہیں وہ تمام بنیادی سہولیات ملیں گی جن کے وہ برسوں سے حقدار اور منتظر ہیں۔ راجہ ثاقب مجید کے اس کامیاب دورے اور درجنوں افراد کی ن لیگ میں شمولیت نے حلقہ کھاوڑہ میں پیپلز پارٹی کے ووٹ بینک کو گہرا دھچکا پہنچایا ہے۔
