راولپنڈی (کشمیر دیجیٹل) وزیراعلیٰ پنجاب مریم نواز کی ہدایت پر 16 سے 18 سال عمر کے نوجوانوں کیلئے جووینائل ڈرائیونگ پرمٹ کی سہولت متعارف کرا دی گئی
پنجاب حکومت کے اس فیصلے کے بعد جس کے بعد کم عمر نوجوان بھی قانونی طریقے سے موٹر سائیکل چلانے کے اہل ہو سکیں گے۔
ٹریفک پولیس کے ترجمان کے مطابق اس نئے نظام کے تحت 16 سے 18 سال عمر کے نوجوان والدین یا سرپرست کی تحریری اجازت کے بعد جووینائل ڈرائیونگ پرمٹ حاصل کر سکیں گے۔
جووینائل پرمٹ کے حامل افراد کو صرف موٹر سائیکل یا سکوٹی چلانے کی اجازت ہوگی جبکہ 125 سی سی تک کی موٹر سائیکل استعمال کی جا سکے گی۔
مزید یہ بھی پڑھیں:سرکاری ملازمین کے لیے پیٹرول اور گاڑیوں کی سہولت بحال، جمعہ کی چھٹی ختم
حکام کا کہنا ہے کہ پرمٹ کے حصول کے لیے سمارٹ قومی شناختی کارڈ یا ب فارم پیش کرنا لازمی ہوگا۔ درخواست گزاروں کو ٹریفک قوانین سے متعلق سائن ٹیسٹ اور روڈ ٹیسٹ دینا ہوگا۔
دونوں امتحانات میں کامیابی حاصل کرنے والے امیدواروں کو موقع پر ہی پرمٹ جاری کر دیا جائے گا۔
چیف ٹریفک آفیسر راولپنڈی فرحان اسلم کے مطابق اس اقدام کا مقصد نوجوانوں میں محفوظ ڈرائیونگ کے فروغ اور ٹریفک قوانین سے آگاہی پیدا کرنا ہے، جووینائل پرمٹ رکھنے والے تمام نوجوانوں کیلئے ہیلمٹ پہننا لازمی ہوگا۔
مزید یہ بھی پڑھیں:آزاد کشمیر : انٹرنیٹ سروس معطلی میں مزید توسیع ، نوٹیفکیشن جاری
ٹریفک پولیس کے مطابق جووینائل ڈرائیونگ پرمٹ کی سالانہ فیس 500 سے 1000 روپے مقرر کی گئی ہے، سنگین یا بار بار ٹریفک قوانین کی خلاف ورزی کی صورت میں پرمٹ منسوخ بھی کیا جا سکتا ہے۔
