محکمہ موسمیات نے آزاد کشمیر، گلگت بلتستان اور خیبرپختونخوا کے مختلف اضلاع میں تیز ہواؤں اور گرج چمک کے ساتھ بارش کی پیشگوئی کی ہے۔ بالائی علاقوں میں موسم میں اچانک تبدیلی کے باعث مطلع ابر آلود رہنے اور ژالہ باری کا بھی امکان ہے۔
کشمیر اور بالائی علاقوں میں بارش کا الرٹ:
رپورٹ کے مطابق کشمیر اور ملحقہ علاقوں میں مغربی ہواؤں کے داخل ہونے سے موسم خوشگوار ہونے کی توقع ہے۔ ان علاقوں میں کہیں درمیانی اور کہیں تیز بارش کے ساتھ ژالہ باری بھی ہو سکتی ہے، جس سے درجہ حرارت میں نمایاں کمی آئے گی۔ انتظامیہ نے سیاحوں اور مقامی آبادی کو پہاڑی مقامات پر محتاط رہنے کی ہدایت کی ہے۔
یہ بھی پڑھیں: این ڈی ایم اے کا الرٹ جاری، کن علاقوں میں شدید بارش اور ژالہ باری کا امکان ہے؟
اسلام آباد اور پنجاب میں آندھی کی توقع:
وفاقی دارالحکومت اسلام آباد، خطہ پوٹھوہار اور شمال مشرقی پنجاب میں بھی مطلع جزوی طور پر ابر آلود رہے گا۔ محکمہ موسمیات کے مطابق ان علاقوں میں آندھی چلنے اور گرج چمک کے ساتھ ہلکی بارش کا امکان ہے، جس سے گزشتہ چند دنوں سے جاری شدید گرمی کا زور ٹوٹنے کی امید ظاہر کی جا رہی ہے۔
سندھ اور بلوچستان میں شدید گرمی کی لہر:
دوسری جانب سندھ اور جنوبی بلوچستان میں آج موسم شدید گرم اور خشک رہنے کی توقع ہے۔ ماہرینِ موسمیات نے شہریوں کو دھوپ سے بچنے اور پانی کا زیادہ سے زیادہ استعمال کرنے کی تاکید کی ہے۔ دوپہر کے اوقات میں غیر ضروری طور پر کھلے آسمان تلے نکلنے سے گریز کرنے کا مشورہ بھی دیا گیا ہے تاکہ ہیٹ اسٹروک جیسی صورتحال سے بچا جا سکے۔
کراچی کے درجہ حرارت میں اضافہ:
کراچی میں آج زیادہ سے زیادہ درجہ حرارت 34 سے 36 ڈگری سینٹی گریڈ تک جانے کا امکان ہے، جبکہ ہوا میں نمی کا تناسب 74 فیصد ہونے کی وجہ سے حبس کی کیفیت رہے گی۔ اس وقت شہر کا درجہ حرارت 29 ڈگری سینٹی گریڈ ہے اور جنوب مغرب کی سمت سے ہوائیں چل رہی ہیں۔ آئندہ 24 گھنٹوں کے دوران شہر قائد کا موسم گرم و مرطوب رہے گا۔
