واشنگٹن:امریکی صدر ڈونلڈ ٹرمپ نے دعویٰ کیا ہے کہ امریکی بحریہ نے ایک ایرانی پرچم بردار جہاز کو اپنی تحویل میں لے لیا ہے جو آبنائے ہرمز میں امریکہ کی جانب سے قائم ناکہ بندی کو عبور کرنے کی کوشش کر رہا تھا۔
ٹرمپ نے اپنے سوشل میڈیا بیان میں کہا کہ امریکی بحریہ کے ایک جنگی جہاز نے خلیج عمان میں اس جہاز کو روکنے کی کوشش کی اور اسے واضح طور پر رکنے کی وارننگ دی گئی، تاہم جہاز کے ایرانی عملے نے احکامات ماننے سے انکار کر دیا۔
یہ بھی پڑھیں:امریکی نمائندے مذاکرات کیلئے کل شام کو اسلام آباد پہنچ جائیں گے، صدر ٹرمپ
ان کے مطابق اس کے بعد امریکی بحری جہاز نے کارروائی کرتے ہوئے جہاز کے انجن والے حصے کو نشانہ بنایا، جس کے نتیجے میں وہ اپنی حرکت جاری نہ رکھ سکا۔
انہوں نے کہا کہ اس وقت امریکی میرین اہلکار اس جہاز کو اپنی تحویل میں لے چکے ہیں اور اس پر مکمل کنٹرول حاصل کر لیا گیا ہے۔
ٹرمپ کے مطابق یہ جہاز پہلے سے ہی امریکی پابندیوں کی فہرست میں شامل تھا اور اس کا ماضی غیر قانونی سرگرمیوں سے جڑا ہوا بتایا جاتا ہے۔
انہوں نے کہا کہ اب اس جہاز پر موجود سامان کا جائزہ لیا جا رہا ہے تاکہ اس کی نوعیت اور ممکنہ مقاصد کا تعین کیا جا سکے۔
یہ بھی پڑھیں:ٹرمپ کی ایرانی تہذیب مٹانے کی دھمکی، ایرانی سفارت خانے کا فنِ تعمیر کے شاہکاروں سے کرارا جواب
یاد رہے کہ ایک طرف امریکی صدر ڈونلڈ ٹرمپ نے ایران سے مذاکرات کیلئے امریکی ٹیم روانہ کرنے کا اعلان کیا جبکہ دوسری طرف ناکہ بندی بھی برقرار رکھی ہے جس پر مذاکرات پر خدشات سامنے آ گئے ہیں
