اسلام آباد : اتوار کے روز بڑے پیمانے پر انٹرنیٹ اور موبائل نیٹ ورکس کی بندش نے معمولاتِ زندگی کو شدید متاثر کیا، جس کی زد میں دارالحکومت کے تمام بڑے موبائل آپریٹرز آ گئے۔ نایاتل (Nayatel)، پی ٹی سی ایل (PTCL)، جاز (Jazz)، یوفون (Ufone) (Zong) کی خدمات معطل ہونے کی وجہ سے صارفین کو طویل وقت تک رابطے میں شدید مشکلات کا سامنا کرنا پڑا۔
موبائل بینکنگ اور سوشل میڈیا خدمات معطل:
اس اچانک تعطل کے نتیجے میں ایزی پیسہ (EasyPaisa) اور جاز کیش (JazzCash) سمیت تمام اہم موبائل بینکنگ ایپلیکیشنز کی سروسز بھی متاثر ہوئیں۔ اس کے علاوہ، شہر بھر میں سوشل میڈیا کے مختلف پلیٹ فارمز تک رسائی بھی سخت دشواری کا شکار رہی، جس پر دارالحکومت کے شہریوں نے سوشل میڈیا پر شدید ردعمل کا اظہار کیا۔
یہ بھی پڑھیں: آزاد کشمیر میں انٹرنیٹ بحالی کیس کی سماعت 14 اکتوبر کو ہوگی
حکام کا مؤقف اور سیکیورٹی خدشات:
اس خرابی یا بندش کی حتمی وجوہات تاحال باضابطہ طور پر سامنے نہیں آ سکی ہیں اور نہ ہی متعلقہ حکام نے معمول کی سروسز کی بحالی کے حوالے سے کوئی حتمی بیان جاری کیا ہے۔ یہ صورتحال پی ٹی آئی کی متوقع احتجاجی کال کے پیش نظر سیکورٹی انتظامات کے تناظر میں سامنے آئی ہے۔ اس سے قبل وزارتِ داخلہ، وزارتِ انفارمیشن ٹیکنالوجی اور پاکستان ٹیلی کمیونیکیشن اتھارٹی (PTA) کے حکام کے درمیان ٹیلی کمیونیکیشن نیٹ ورک کے جائزے کے لیے اعلیٰ سطحی اجلاس بھی منعقد ہوئے تھے، تاہم پی ٹی اے حکام کا کہنا تھا کہ ملک کے کسی بھی حصے میں سروس محدود کرنے کا کوئی باضابطہ حکم جاری نہیں کیا گیا۔
