اسلام آباد میں وزیراعظم آزاد حکومت ریاست جموں و کشمیر بیرسٹر افتخار علی گیلانی سے رکن قانون ساز اسمبلی سحرش قمر نے اہم ملاقات کی ہے، جس میں کشمیر کاز، آزاد کشمیر میں سیاحت کے فروغ، سرمایہ کاری کے مواقع، نجی شعبے کے تعاون اور خطے کی مجموعی ترقی سمیت باہمی دلچسپی کے مختلف امور پر تفصیلی تبادلہ خیال کیا گیا۔
ملاقات کے دوران سحرش قمر نے وزیراعظم آزاد کشمیر بیرسٹر افتخار علی گیلانی کو وزارتِ عظمیٰ کا منصب سنبھالنے اور بہترین کابینہ تشکیل دینے پر مبارکباد پیش کی۔ انہوں نے گفتگو کرتے ہوئے کہا کہ وزیراعلیٰ پنجاب مریم نواز شریف کا 100 روزہ ترقیاتی پلان آزاد کشمیر کے لیے بھی انتہائی خوش آئند ہے۔ ان کا کہنا تھا کہ مسلم لیگ (ن) کا ہمیشہ سے یہ طرزِ عمل رہا ہے کہ پنجاب میں کامیابی سے جاری ترقیاتی منصوبوں اور عوامی فلاح کے پروگراموں کو آزاد کشمیر میں بھی مؤثر انداز میں متعارف کرایا جائے۔
قائد مسلم لیگ (ن) کا وژن اور ٹیم کی کارکردگی:
سحرش قمر نے مزید کہا کہ قائد مسلم لیگ (ن) کے روشن کشمیر کے وژن کو حکومت آزاد کشمیر ایک بہترین اور باصلاحیت ٹیم کے ساتھ عملی جامہ پہنائے گی۔ انہوں نے اس بات پر زور دیا کہ آزاد کشمیر میں ترقی، خوشحالی، روزگار کے مواقع کی فراہمی اور عوامی مسائل کے فوری حل کے لیے مربوط اقدامات اٹھانے کی اشد ضرورت ہے۔
یہ بھی پڑھیں: وزیراعظم آزاد کشمیر افتخار گیلانی کی زیر صدارت محکمہ ان لینڈ ریونیو کا اجلاس، مالیاتی اہداف اور ٹیکس نظام کا جائزہ
خواتین کی نمائندگی کی تعریف اور حکومت کا عزائم:
وزیراعظم آزاد کشمیر بیرسٹر افتخار علی گیلانی نے سحرش قمر کو اسمبلی میں مؤثر اور مضبوط آواز بننے اور خواتین کی بہترین نمائندگی کرنے پر خراجِ تحسین پیش کرتے ہوئے سراہا اور کہا کہ حکومت آزاد کشمیر عوامی مسائل کے حل اور خطے کی جامع ترقی کے لیے بھرپور اقدامات کرے گی۔
انہوں نے واضح کیا کہ وزیراعلیٰ پنجاب مریم نواز شریف کے ترقیاتی وژن اور تجربات سے استفادہ کرتے ہوئے آزاد کشمیر کی تعمیر و ترقی کے لیے دن رات کام کیا جائے گا۔ انہوں نے کہا کہ حکومت خطے کے وسیع تر سیاحتی امکانات کو بروئے کار لاتے ہوئے سیاحت کو معاشی ترقی، روزگار کے نئے مواقع پیدا کرنے اور مقامی معیشت کے استحکام کا اہم ترین ذریعہ بنانا چاہتی ہے۔
نجی سرمایہ کاری اور سیاحت کے مواقع:
ملاقات کے دوران آزاد کشمیر میں نجی شعبے کی سرمایہ کاری کو راغب کرنے، مختلف سیاحتی مقامات کی ترقی اور مقامی سطح پر معاشی سرگرمیوں کو فروغ دینے کے لیے عملی اقدامات پر بھی تفصیلی گفتگو کی گئی۔ سحرش قمر نے وزیراعظم آزاد کشمیر کو بہترین کابینہ کی تشکیل پر ایک بار پھر مبارکباد پیش کرتے ہوئے ان کی حکومت کے لیے نیک تمناؤں اور خواہشات کا اظہار کیا۔
