سابق قومی کرکٹ ٹیم کے کپتان شاہد آفریدی کا پالتو کتا میکس اسلام آباد سے لاپتہ ہوگیا۔ اس سے قبل سابق کپتان وسیم اکرم کا پالتو کتا بھی گم ہوگیا تھا، جسے بعد ازاں تلاش کرلیا گیا تھا۔
شاہد آفریدی نے سوشل میڈیا پر اطلاع دے دی
شاہد آفریدی نے سوشل میڈیا پر اپنے پالتو کتے کے لاپتہ ہونے کی اطلاع دیتے ہوئے بتایا کہ ان کا پیارا میکس گم ہوگیا ہے۔ انہوں نے کہا کہ میکس جب ان کی زندگی میں آیا تو اس وقت وہ صرف 30 سے 35 دن کا ننھا سا پپی تھا۔
بیماری کے دوران میکس کی جان بچی
سابق کپتان کے مطابق میکس نے شدید بیماری کے دوران اسپتال میں زندگی کی جنگ لڑی اور صحت یاب ہونے کے بعد اسے گھر کے ایک فرد کی طرح محبت اور توجہ سے پالا گیا۔ شاہد آفریدی نے کہا کہ میکس ان کے خاندان کے لیے بہت اہم ہے۔
میکس کی تلاش میں عوام سے مدد کی اپیل
شاہد آفریدی نے اپیل کی کہ اگر کسی شخص کو میکس ملے یا اس کے بارے میں کوئی معلومات حاصل ہوں تو اسے محفوظ رکھا جائے، اس کا خیال رکھا جائے اور فوری طور پر اہل خانہ کو اطلاع دی جائے تاکہ میکس کو واپس گھر لایا جاسکے۔
ویڈیو زیادہ سے زیادہ شیئر کرنے کی درخواست
سابق کپتان نے سوشل میڈیا صارفین سے میکس کی ویڈیو زیادہ سے زیادہ شیئر کرنے کی بھی درخواست کی ہے تاکہ اس کی تلاش میں مدد مل سکے اور وہ جلد اپنے گھر واپس پہنچ سکے۔
وسیم اکرم کا کتا بھی ہوچکا ہے لاپتہ
واضح رہے کہ اس سے قبل سابق قومی کپتان وسیم اکرم کا پالتو کتا بھی لاپتہ ہوگیا تھا۔ کتے کی تلاش میں مدد دینے والے شخص کیلئے 2 لاکھ 50 ہزار روپے نقد انعام کا اعلان کیا گیا تھا، جس کے بعد کتے کو تلاش کرلیا گیا تھا۔
مزید یہ بھی پڑھیں:ڈومیسٹک کرکٹ نہ کھیلنے والوں کیلئے ٹیم میں کوئی گنجائش نہیں : چیئرمین پی سی بی
