میرپور : آزاد جموں و کشمیر کے شہر میرپور میں زندگی کے مختلف شعبوں سے تعلق رکھنے والی خواتین کی ایک بہت بڑی تعداد نے خطے میں پائیدار امن، بھائی چارے اور معاشی استحکام کے حق میں مشترکہ آواز بلند کرتے ہوئے کالعدم جوائنٹ عوامی ایکشن کمیٹی (JAAC) کا مکمل بائیکاٹ کرنے کا اعلان کر دیا ہے۔
کشمیر پریس کلب میرپور میں مسلم کانفرنس کی محترمہ کشور ناہید، عام آدمی پارٹی کی چیئرپرسن نائلہ شکور، معروف سماجی کارکن نسرین فاروق اور سوشل میڈیا ایکٹوسٹ تمنا حنان لون سمیت دیگر ممتاز خواتین رہنماؤں کی سربراہی میں ایک اہم اور پرہجوم پریس کانفرنس کا انعقاد کیا گیا۔
پریس کانفرنس سے خطاب کرتے ہوئے مقررین نے دوٹوک الفاظ میں کہا کہ آزاد کشمیر تاریخی طور پر ایک انتہائی پُرامن خطہ ہے، لیکن بدقسمتی سے کالعدم جوائنٹ عوامی ایکشن کمیٹی یہاں انتشار، بدامنی اور کشیدگی پھیلا رہی ہے، جس کی اس غیور معاشرے میں کوئی گنجائش نہیں۔ انہوں نے زور دیا کہ حالیہ حالات کے تناظر میں آزاد کشمیر کے عوام کو ایسے تمام عناصر سے ہر وقت ہوشیار رہنے کی سخت ضرورت ہے جو ہمارے پُرامن معاشرے میں تقسیم، نفرت اور بے چینی کو فروغ دینا چاہتے ہیں۔
یہ بھی پڑھیں: مظفرآباد : اہم امن جرگہ؛ سابق ججز، وکلاء، صحافیوں اور مذہبی جماعتوں کے اکابرین سر جوڑ کر بیٹھ گئے
پاکستان اور آزاد کشمیر کا رشتہ لازوال ہے:
خواتین رہنماؤں نے پاک کشمیر تعلقات پر روشنی ڈالتے ہوئے واضح کیا کہ پاکستان اور آزاد کشمیر کا رشتہ محض سیاسی نہیں بلکہ تاریخی، نظریاتی اور لازوال عوامی جذبات پر مبنی ہے، جسے دنیا کی کوئی بھی طاقت یا انتشار پسند گروہ کسی صورت کمزور نہیں کر سکتا۔ انہوں نے مزید کہا کہ پاکستان نے ہمیشہ ہر مشکل گھڑی میں آزاد کشمیر کے عوام کا ساتھ دیا ہے اور خطے کی تعمیر و ترقی سمیت شہریوں کو بنیادی سہولیات کی فراہمی کے لیے ہمیشہ بھرپور اور مخلصانہ کوششیں کی ہیں۔
افواہوں کو مسترد کرنے اور امن کے فروغ کی اپیل:
مقررین نے پریس کانفرنس کے دوران کہا کہ آزاد کشمیر کے باشعور عوام صرف امن، ترقی اور ریاستی استحکام کے حامی ہیں اور وہ کسی بھی ایسے منفی طرزِ عمل یا احتجاج کو اب ہرگز قبول نہیں کریں گے جو ریاست میں کسی بھی قسم کی بدامنی یا معاشی کشیدگی کا سبب بنے۔ انہوں نے آزاد خطے کے تمام عوام، بالخصوص خواتین سے پرزور اپیل کی کہ وہ موجودہ نازک وقت میں انتہائی ذمہ داری کا مظاہرہ کریں، سوشل میڈیا یا گلی محلوں میں پھیلائی جانے والی افواہوں اور اشتعال انگیز بیانیوں سے دور رہیں اور اپنے معاشرے میں امن و ہم آہنگی کے فروغ کے لیے اپنا بھرپور کردار ادا کریں۔
انتشار پسند سوچ کو کامیاب نہیں ہونے دیا جائے گا:
اس اہم پریس کانفرنس میں خواتین اور بچوں کی ایک بہت بڑی تعداد نے شرکت کر کے یکجہتی کا اظہار کیا۔ پریس کانفرنس کے اختتام پر تمام مقررین اور شرکاء نے اس پختہ عزم کا اعادہ کیا کہ آزاد کشمیر کو امن، بھائی چارے اور تیز رفتار ترقی کا گہوارہ بنانے کے لیے ہر سطح پر ممکنہ کوششیں جاری رکھی جائیں گی اور کسی بھی وطن دشمن، غدار یا انتشار پسند سوچ کو یہاں کبھی بھی کامیاب نہیں ہونے دیا جائے گا۔
