کرکٹ آسٹریلیا نے پاکستان کے خلاف آئندہ ہونے والی ون ڈے سیریز کے لیے اپنے باقاعدہ اسکواڈ کا اعلان کر دیا ہے۔ اس دورے کے ساتھ ساتھ آسٹریلوی بورڈ نے دورہ بنگلہ دیش کے لیے بھی اپنی وائٹ بال ٹیموں کی تفصیلات جاری کر دی ہیں۔
آسٹریلیا نے دورہ پاکستان کے دوران تین ون ڈے میچوں پر مشتمل سیریز کھیلنی ہے، جس کے لیے تجربہ کار کھلاڑی مچل مارش کو ٹیم کا کپتان مقرر کیا گیا ہے۔ آسٹریلوی اسکواڈ میں اسٹار کھلاڑیوں کی واپسی ہوئی ہے جو پاکستانی کنڈیشنز میں اپنی صلاحیتوں کے جوہر دکھائیں گے۔
یہ بھی پڑھیں: پاکستان بنگلا دیش پہلا ٹیسٹ، شاہین آفریدی نے بڑا اعزاز اپنے نام کرلیا
آسٹریلوی اسکواڈ کی تفصیلات:
اعلان کردہ اسکواڈ میں کپتان مچل مارش کے ہمراہ الیکس کیری، نیتھن ایلس، کیمرون گرین اور جوش انگلس شامل ہیں۔ دیگر کھلاڑیوں میں میتھیو کہنیمن، مارنوس لبوشین، رائلی میریڈیتھ، اولی پیک، میتھیو رنشا، تنویر سانگھا، لیام اسکاٹ، میتھیو شارٹ، بلی اسٹینلیک اور اسٹار اسپنر ایڈم زمپا بھی آسٹریلوی ٹیم کا حصہ ہوں گے۔ یہ اسکواڈ متوازن دکھائی دیتا ہے جس میں پیسرز اور اسپنرز کا بہترین امتزاج موجود ہے۔
میچوں کا شیڈول اور مقامات:
پاکستان اور آسٹریلیا کے درمیان ون ڈے سیریز کا پہلا مقابلہ 30 مئی کو راولپنڈی کرکٹ اسٹیڈیم میں کھیلا جائے گا۔ اس کے بعد دونوں ٹیمیں لاہور منتقل ہو جائیں گی جہاں سیریز کے بقیہ دو میچز 2 اور 4 جون کو قذافی اسٹیڈیم میں منعقد ہوں گے۔ شائقینِ کرکٹ کو ہوم گراؤنڈ پر ایک سنسنی خیز سیریز کی توقع ہے۔
مزید پڑھیں: بنگلہ دیش کے خلاف ٹیسٹ: محمد عباس کی پانچ وکٹیں، پاکستان کی پوزیشن مستحکم
دورہ بنگلہ دیش کا اعلان:
پاکستان کے ساتھ ساتھ آسٹریلیا نے دورہ بنگلہ دیش کے لیے بھی اپنی حکمت عملی واضح کر دی ہے۔ دورہ بنگلہ دیش میں آسٹریلوی ٹیم 3 ون ڈے اور 3 ٹی ٹوئنٹی میچز کی سیریز کھیلے گی۔ کرکٹ آسٹریلیا کے مطابق ان دوروں کا مقصد ایشیائی کنڈیشنز میں ٹیم کی کارکردگی کو مزید بہتر بنانا ہے۔
