اسلام آباد(کشمیر ڈیجیٹل) وزیراعظم محمد شہباز شریف اور وزیرِ داخلہ سید محسن رضا نقوی کے درمیان ایک اہم ملاقات ہوئی جس میں ملک کی مجموعی سکیورٹی صورتحال اور پاکستان سپر لیگ (پی ایس ایل) کے آئندہ مرحلے کے فائنل میچ کے انتظامات پر تفصیلی غور کیا گیا ۔
یہ ملاقات وزیراعظم ہاؤس میں منعقد ہوئی جہاں وزیرِ داخلہ نے موجودہ امن و امان کی صورتحال پر جامع بریفنگ دی اور حکومت کی جانب سے کیے گئے سکیورٹی اقدامات سے وزیراعظم کو آگاہ کیا۔وزیرِ داخلہ نے خاص طور پر پی ایس ایل فائنل کے موقع پر کیے جانے والے حفاظتی انتظامات پر تفصیل سے روشنی ڈالی ۔
انہوں نے بتایا کہ ایونٹ کے دوران کھلاڑیوں، آفیشلز، شائقین اور دیگر عملے کی حفاظت کو یقینی بنانےکیلئے ایک مکمل اور جامع سکیورٹی پلان ترتیب دیا گیا ہے ۔ اس پلان کے تحت قانون نافذ کرنیوالے ادارے مکمل طور پر الرٹ اور متحرک رہیں گے جبکہ اہم مقامات پر اضافی سکیورٹی اہلکاروں کی تعیناتی بھی عمل میں لائی جا رہی ہے ۔
مزید یہ بھی پڑھیں:وزیراعظم شہباز شریف کا ‘اپنا گھر اسکیم’ کا باضابطہ آغاز، مستحقین میں بینک چیک تقسیم
مزید بتایا گیا کہ جدید نگرانی کے نظام، سی سی ٹی وی کیمروں اور دیگر تکنیکی وسائل کو بھی بروئے کار لایا جا رہا ہے تاکہ کسی بھی ممکنہ ناخوشگوار صورتحال سے بروقت نمٹا جا سکے اور ایونٹ کو پرامن انداز میں مکمل کیا جا سکے ۔ وزیرِ داخلہ نے اس بات پر زور دیا کہ تمام متعلقہ ادارے باہمی تعاون کے ساتھ اپنے فرائض انجام دے رہے ہیں تاکہ سکیورٹی کے کسی پہلو میں کوئی کمی نہ رہے ۔
وزیراعظم محمد شہباز شریف نے اجلاس کے دوران ہدایت دی کہ پی ایس ایل فائنل کے دوران فول پروف سکیورٹی کو ہر صورت یقینی بنایا جائے اور تمام ادارے اپنی ذمہ داریاں بہترین انداز میں ادا کریں ۔ انہوں نے کہا کہ عوام کو محفوظ، پرامن اور خوشگوار ماحول فراہم کرنا حکومت کی اولین ترجیح ہے اور اس مقصد کے لیے کسی قسم کی غفلت برداشت نہیں کی جائے گی ۔
مزید یہ بھی پڑھیں:پہلگام فالس فلیگ ثابت ہوچکا، پانی روکا تو خوفناک جواب ملے گا، وزیراعظم شہباز شریف کی بھارت کو وارننگ
وزیراعظم نے متعلقہ اداروں کو یہ بھی ہدایت دی کہ وہ آپس میں رابطہ مزید مؤثر بنائیں اور دستیاب تمام وسائل کو بروئے کار لاتے ہوئے ایونٹ کو کامیاب اور محفوظ بنائیں ۔ وزیرِ داخلہ نے وزیراعظم کو مکمل یقین دہانی کرائی کہ تمام ادارے مربوط حکمت عملی کے تحت کام کر رہے ہیں اور پی ایس ایل فائنل کے کامیاب انعقاد کے لیے ہر ممکن اقدامات کیے جا رہے ہیں ۔
