سابق پاکستانی کپتان شعیب ملک ایک بار پھر اپنی نجی زندگی کی وجہ سے خبروں کی زینت بن گئے ہیں۔ گلف نیوز اور سوشل میڈیا کے مختلف پلیٹ فارمز پر یہ افواہیں تیزی سے پھیل رہی ہیں کہ کرکٹ اسٹار 27 فروری کو معروف پاکستانی اداکارہ ونیزا ستار کے ساتھ رشتہ ازدواج میں منسلک ہونے والے ہیں۔ یہ قیاس آرائیاں ایک ایسے وقت میں سامنے آئی ہیں جب شعیب ملک اور ان کی موجودہ اہلیہ ثنا جاوید کے درمیان ممکنہ علیحدگی کی خبریں بھی گردش کر رہی تھیں۔ تاہم، تاحال شعیب ملک یا ونیزا ستار کی جانب سے ان خبروں کی کوئی باقاعدہ تصدیق یا تردید سامنے نہیں آئی ہے۔
اگر یہ افواہیں درست ثابت ہوتی ہیں تو یہ شعیب ملک کی چوتھی شادی ہوگی۔ ان کی پہلی شادی 2002 میں عائشہ صدیقی سے ہوئی تھی جو 2010 میں ختم ہوئی۔ اسی سال انہوں نے بھارتی ٹینس اسٹار ثانیہ مرزا سے شادی کی، جس کا اختتام 2024 میں طلاق پر ہوا، ان کا ایک بیٹا ازہان مرزا ملک بھی ہے۔ ثانیہ مرزا سے علیحدگی کے فوراً بعد 20 جنوری 2024 کو شعیب ملک نے اداکارہ ثنا جاوید سے شادی کی تھی۔ ونیزا ستار کی بات کریں تو وہ کراچی کی رہائشی اور ٹی وی انڈسٹری کی ابھرتی ہوئی اداکارہ ہیں، جنہوں نے ڈرامہ “لاڈلی” میں اپنے کردار سے شہرت حاصل کی۔
یہ بھی پڑھیں: جنرل (ر) شیر افگن کی بطور صدر آزاد کشمیر تقرری کا دعویٰ جھوٹا نکلا: فیکٹ چیک میں بھارتی سوشل میڈیا مہم کا بھانڈا پھوٹ گیا
دوسری جانب، ان افواہوں کے درمیان کچھ حیران کن حقائق بھی موجود ہیں۔ چند روز قبل ہی شعیب ملک نے سوشل میڈیا پر ثنا جاوید کے ساتھ چھٹیاں منانے کی تصاویر شیئر کیں، جن میں جوڑے کو خوشگوار موڈ میں دیکھا جا سکتا ہے۔ ان تصاویر کے بعد کئی صارفین کا خیال ہے کہ شادی میں تناؤ کی خبریں محض افواہ ہو سکتی ہیں۔ اب یہ دیکھنا باقی ہے کہ 27 فروری کے حوالے سے گردش کرنے والی یہ خبریں حقیقت کا روپ دھارتی ہیں یا یہ محض ایک پبلسٹی اسٹنٹ ثابت ہوتی ہیں۔
