عوام کے لیے مہنگائی کی ایک اور لہر سامنے آ گئی ہے، جہاں ڈیزل کے بعد مٹی کے تیل کی قیمت میں بھی نمایاں اضافہ کر دیا گیا ہے۔ قیمتوں میں حالیہ اضافے نے عام صارفین کو شدید تشویش میں مبتلا کر دیا ہے کیونکہ یہ ایندھن روزمرہ استعمال اور متبادل ذرائع کے طور پر خاص اہمیت رکھتا ہے۔
سرکاری نوٹیفکیشن کے مطابق مٹی کے تیل کی قیمت میں 4 روپے 92 پیسے فی لیٹر اضافہ کیا گیا ہے، جس کے بعد مٹی کے تیل کی نئی قیمت 175 روپے 80 پیسے فی لیٹر مقرر کر دی گئی ہے۔ نوٹیفکیشن میں واضح کیا گیا ہے کہ مٹی کے تیل کی نئی قیمت کا اطلاق آج سے کر دیا گیا ہے۔
اس سے قبل مٹی کے تیل کی قیمت 170 روپے 88 پیسے فی لیٹر مقرر تھی، جو اب اضافے کے بعد نمایاں طور پر بڑھ چکی ہے۔ قیمتوں میں یہ اضافہ ایسے وقت میں سامنے آیا ہے جب پہلے ہی مہنگائی عوام پر دباؤ ڈال رہی ہے۔
یہ بھی پڑھیں: پیٹرول کی قیمت برقرار، ڈیزل فی لیٹر 11روپے اضافہ،نوٹیفکیشن جاری
ادھر پیٹرولیم ڈویژن نے رات گئے ہائی اسپیڈ ڈیزل کی قیمتوں میں بھی اضافے کا اعلان کیا تھا۔ اعلامیے کے مطابق ہائی اسپیڈ ڈیزل کی قیمت میں 11 روپے 30 پیسے فی لیٹر اضافہ کیا گیا ہے، جس سے ٹرانسپورٹ اور دیگر متعلقہ شعبوں پر اثرات مرتب ہونے کا امکان ہے۔
تاہم نوٹیفکیشن میں یہ بھی بتایا گیا ہے کہ یکم فروری سے پیٹرول کی قیمت برقرار رکھی گئی ہے، یعنی پیٹرول کی قیمت میں فی الحال کوئی رد و بدل نہیں کیا گیا۔
مزید پڑھیں: پیٹرولیم قیمتوں میں رد و بدل ،ڈیزل کی قیمت میں اضافے کا امکان
حالیہ فیصلوں کے بعد ایک طرف ڈیزل اور مٹی کے تیل کی قیمتوں میں اضافہ ہو چکا ہے، جبکہ دوسری جانب پیٹرول کی قیمت میں استحکام برقرار رکھا گیا ہے۔ پیٹرولیم مصنوعات کی قیمتوں میں اس تازہ تبدیلی کا اطلاق فوری طور پر نافذ العمل ہو گیا ہے۔
