انڈیا میں ایک غیر معمولی اور پرتعیش گھڑی متعارف کرائی گئی ہے جس کی تھیم نجی چڑیا گھر پر مبنی ہے۔ یہ چڑیا گھر ایشیا کے امیر ترین شخص مکیش امبانی کے خاندان کی ملکیت اور نگرانی میں بتایا جاتا ہے۔ اس گھڑی نے اپنی منفرد ڈیزائننگ، قیمتی جواہرات اور غیر روایتی تھیم کے باعث عالمی توجہ حاصل کی ہے۔
اس لگژری گھڑی کے عین مرکز میں مکیش امبانی کے سب سے چھوٹے بیٹے آننت امبانی کا ہاتھ سے رنگ کیا گیا ایک مجسمہ نصب ہے۔ اس مجسمے کے گرد شیر اور بنگال ٹائیگر کی شبیہیں بھی بنائی گئی ہیں، جو گھڑی کے مجموعی تصور کو نمایاں کرتی ہیں۔ گھڑی کو معروف لگژری واچ ساز کمپنی جیکب اینڈ کمپنی نے ڈیزائن کیا ہے، جبکہ اس میں قیمتی ہیرے بھی جڑے ہوئے ہیں، جو اس کی پرتعیش شناخت کو مزید اجاگر کرتے ہیں۔
یہ بھی پڑھیں: دنیا کا منفرد گاؤں جہاں مردوں کا داخلہ ممنوع ہے
اگرچہ گھڑی بنانے والی کمپنی کی جانب سے اس کی سرکاری قیمت ظاہر نہیں کی گئی، تاہم صنعتی اتحادی واچوپیا کے مطابق اس گھڑی کی متوقع قیمت تقریباً 15 لاکھ ڈالرز بتائی گئی ہے۔ انڈین کرنسی میں یہ رقم تقریباً 13 کروڑ 70 لاکھ روپے بنتی ہے، جبکہ پاکستانی کرنسی میں اس کی مالیت تقریباً 42 کروڑ روپے کے قریب بنتی ہے۔ یہی وجہ ہے کہ اس گھڑی کو دنیا کی مہنگی اور منفرد گھڑیوں میں شمار کیا جا رہا ہے۔
یہ گھڑی جس چڑیا گھر کی تھیم پر بنائی گئی ہے، اسے جنگلی حیات کے بچاؤ اور بحالی کے نجی مرکز کے طور پر پیش کیا جاتا ہے۔ بتایا جاتا ہے کہ یہ چڑیا گھر تقریباً تین ہزار 500 ایکڑ رقبے پر پھیلا ہوا ہے، جہاں شیر، ہاتھی سمیت جانوروں کی دو ہزار سے زائد اقسام موجود ہیں۔ یہ چڑیا گھر آننت امبانی کی ملکیت ہے اور عام افراد کو وہاں داخلے کی اجازت نہیں دی جاتی۔
گزشتہ برس یہ نجی چڑیا گھر اس وقت خبروں میں آیا تھا جب اس پر جانوروں کو غیر قانونی طریقے سے حاصل کرنے اور ان کے ساتھ بدسلوکی کے الزامات سامنے آئے تھے۔ تاہم بعد ازاں سپریم کورٹ کی جانب سے مقرر کردہ ٹیم نے اپنی رپورٹ میں قرار دیا تھا کہ انھیں کسی بھی غلط عمل کے شواہد نہیں ملے۔
یہ بھی پڑھیں: پرواز 30 سے زائد مسافروں کو بھول کر روانہ، مسافر حیران و پریشان
یہ چڑیا گھر انڈیا کی مغربی ریاست گجرات میں جام نگر کے مقام پر واقع ہے۔ اسی علاقے کے قریب دنیا کا سب سے بڑا تیل صاف کرنے کا کارخانہ بھی موجود ہے، جو مکیش امبانی کی ملکیت بتایا جاتا ہے۔
