اسلام آباد(کشمیر ڈیجیٹل) نیشنل ڈیٹا بیس اینڈ رجسٹریشن اتھارٹی( نادرا) نے شادی شدہ شہریوں کو خبردار کیا ہے کہ وہ اپنی ازدواجی حیثیت اپ ڈیٹ کروالیں ورنہ قانونی مسائل کا سامنا ہوسکتا ہے۔
تفصیلات کے مطابق نیشنل ڈیٹا بیس اینڈ رجسٹریشن اتھارٹی (نادرا) نے شادی شدہ پاکستانیوں کیلئے اہم ہدایات جاری کردیں۔
ہدایات کے مطابق ہر وہ شہری جو شادی شدہ ہے اپنی ازدواجی حیثیت (Marital Status) کو نادرا کے ریکارڈ میں فوری طور پر اپ ڈیٹ کروائیں تاکہ مستقبل میں کسی بھی قسم کے قانونی مسائل سے بچا جا سکے۔
ترجمان کی جانب سے بیان میں کہا گیا کہ متعدد افراد نے اپنی شادیوں کا اندراج یونین کونسل میں تو کروا رکھا ہے لیکن نادرا ڈیٹا بیس میں ابھی تک معلومات اپ ڈیٹ نہیں کیں۔
مزید یہ بھی پڑھیں:ڈرائیونگ لائسنس کا عمل آسان، موٹرسائیکل سواروں کیلئے نئی سہولت متعارف
ترجمان نے مزید کہا کہ شہری قریبی نادرا سینٹر جا کر اپنی ازدواجی حیثیت کو درست کر سکتے ہیں، یہ عمل نادرا کے اس جاری منصوبے کا حصہ ہے، جس کے تحت شہریوں کا ڈیٹا درست اور جدید بنایا جا رہا ہے۔
اس کے ساتھ ہی نادرا نے شہریوں کی سہولت کے لیے ایک ایس ایم ایس سروس بھی متعارف کرائی ہے تاکہ شادی شدہ افراد کو اس حوالے سے آگاہی فراہم کی جا سکے۔
ترجمان کے مطابق مزید معلومات یا رہنمائی کے لیے شہری نادرا کی ہیلپ لائن 1777 (موبائل صارفین کے لیے) یا 051-111-786-100 پر رابطہ کر سکتے ہیں، یا نادرا کی آفیشل ویب سائٹ www.nadra.gov.pk وزٹ کر سکتے ہیں۔
نادرا نے بتایا کہ شناختی کارڈ پر ازدواجی حیثیت اپ ڈیٹ کروانے کی فیس 100 روپے مقرر ہے تاہم شہریوں کو نکاح نامہ یا شادی کا سرٹیفکیٹ فراہم کرنا لازمی ہے۔
