دبئی: ایشیا کپ ٹی 20 کے فائنل میں بھارت نے آخری اوور میں پاکستان کو 5 وکٹوں سے شکست دے دی ۔
دبئی میں ایشیا کپ کی 41 سالہ تاریخ میں پہلی بار پاک بھارت فائنل ہوا جس میں بھارت نے کامیابی سمیٹی۔
فائنل میچ میں بھارت نے پاکستان کیخلاف ٹاس جیت کر پہلے فیلڈنگ کا فیصلہ کیا، پاکستان کی پوری ٹیم 19 اعشاریہ ایک اوور میں 146 رنز پرڈھیر ہوگئی جواب میں بھارت نے ہدف آخری اوور میں پانچ وکٹوں کے نقصان پر پورا کیا۔
پاکستان کے پہلے آؤٹ ہونے والے کھلاڑی صاحبزادہ فرحان تھے جنہوں نے 38 گیندوں پر 57 رنز کی شاندار اننگز کھیلی اور 84 کے مجموعی اسکور پر ورون کی گیند پر کیچ تھما بیٹھے۔
ان کے بعد ون ڈاؤن آنے والے صائم ایوب 113 کے مجموعی اسکور پر 14 رنز بنا کر کلدیپ کا نشانہ بنے۔
دوسری وکٹ گرنے کے بعد پاکستانی بیٹرزریت کی دیوار ثابت ہوئے اور باقی 8 کھلاڑی صرف 33 رنز پر آؤٹ ہوگئے ۔
صائم ایوب کے بعد محمد حارث بھی صفر پر پویلین لوٹ گئے۔ 126 کے اسکور پر فخر زمان بھی ورون کی گیند پر کیچ آؤٹ ہو گئے، انہوں نے 35 گیندوں پر 46 رنزجوڑے ۔ 131 کے اسکور پر حسین طلعت بھی صرف ایک رنز بنا کر چلتے بنے ۔
ان کے بعد سلمان آغا بھی 8 رنز بنا کرمیدان چھوڑ گئے، شاہین شاہ آفریدی اور فہیم اشرف بغیر کوئی رنز بنائے آؤٹ ہوئے ۔ حارث رؤف اور محمد نواز نے 6،6 رنز بنائے ۔
مزید یہ بھی پڑھیں:بھارت کیخلاف ایشیا کپ فائنل، مائیک ہیسن کا کھلاڑیوں کو پیغام
بھارت کی جانب سے کلدیپ یادیو نے 4 وکٹیں اپنے نام کیں۔ ان کے علاوہ جسپریت بمراہ، ورون اور اکثر پٹیل کے حصے میں 2،2 وکٹیں آئیں۔
ہدف کے تعاقب میں بھارت کی بیٹنگ لائن کوشروع میں مشکلات کا سامنا رہا ۔ بھارت کی پہلی وکٹ دوسرے اوور میں گری جب ابھیشک شرما فہیم اشرف کی گیند پر 5 رنز بنا کر آؤٹ ہوئے ۔ بھارت کی دوسری وکٹ 10 کے اسکور پرگری جب بھارتی کپتان سوریا کمار یادیو ایک رنز بنا کر شاہین شاہ کا شکار بنے۔
20 کے مجموعی اسکور پر شبمن گل بھی 12 رنز بنا کر فہیم اشرف کا شکار بن گئے۔ 77 کے مجموعی اسکور پر سنجو سیمسن 24 رنز بنا کر ابرار کا شکار بنے۔
فائنل کے لیے پاکستان ٹیم کے اسکواڈ میں کوئی تبدیلی نہیں کی گئی ۔ پاکستان ٹیم میں کپتان سلمان علی آغا،صائم ایوب، فخر زمان، صاحبزادہ فرحان، حسین طلعت، محمد حارث، محمد نواز، فہیم اشرف، شاہین آفریدی، حارث رؤف اور ابرار احمد شامل ہیں ۔
بھارتی ٹیم کے آل راؤنڈر ہاردک پانڈیا انجری کے باعث فائنل سے باہر ہوگئے ہیں، ان کی جگہ پلیئنگ الیون میں رنکو سنگھ کو شامل کیا گیا ہے ۔
ایشیا کپ 2025 میں بھارت نے پاکستان کو دونوں میچز میں ہرایا لیکن اس کے علاوہ پاکستان نے اب تک ایشیا کی ہر ٹیم کو شکست دی ۔
پاکستان اور بھارت کسی بھی کثیر ملکی ٹورنامنٹ میں اب تک 5 بار فائنل میں آمنے سامنے آئیں ہیں یہاں پاکستان بھارت سے آگے ہے ۔ پاکستان نے 3 بار جبکہ بھارت نےپاکستان کو 2 بار فائنل میں شکست دی ہے ۔
