میرپور شہر میں گرین بس سروس کے لیے چترپڑی گراؤنڈ میں تجویز کردہ اور متعین ٹرمینل کی تعمیر و ترقی کے حوالے سے ایک انتہائی اہم اجلاس کمشنر میرپور ڈویژن راجہ طاہر ممتاز خان کی زیر صدارت منعقد کیا گیا، جس میں منصوبے کے مختلف امور پر تفصیلی غور کیا گیا۔
اس اعلیٰ سطحی اجلاس میں ڈپٹی کمشنر میرپور چوہدری ساجد اسلم، ڈپٹی ڈائریکٹر واپڈا راجہ وسیم ارشد، سیکرٹری ریجنل ٹرانسپورٹ اتھارٹی واجد علی، انفارمیشن آفیسر خضر حیات اور دیگر تمام متعلقہ محکموں کے حکام نے بھرپور شرکت کی۔
اجلاس کے دوران ٹرمینل کے لیے مختص اراضی کی صفائی اور بہتری کے امور، تعمیراتی معیار، سیفٹی والز کی تعمیر، گاڑیوں کے لیے داخلی اور خارجی راستوں، حفاظتی انتظامات اور وہاں فراہم کی جانے والی بنیادی سہولیات کا نہایت باریک بینی سے جائزہ لیا گیا۔ اس موقع پر واپڈا حکام کی جانب سے اجلاس کو تمام تکنیکی اور حفاظتی امور پر تفصیلی بریفنگ بھی فراہم کی گئی۔
یہ بھی پڑھیں: وزیراعظم آزاد کشمیر بیرسٹر افتخار علی گیلانی نے مظفرآباد میں گرین بس سروس کا افتتاح کر دیا
کمشنر راجہ طاہر ممتاز خان نے تمام متعلقہ اداروں کو سخت ہدایات جاری کرتے ہوئے کہا کہ وہ آپس میں قریبی باہمی رابطے اور ایک مربوط حکمت عملی کے تحت تعمیراتی کاموں کو مزید تیز کریں، اور اس بات کو یقینی بنایا جائے کہ ٹرمینل کے تمام ضروری انتظامات مقررہ کردہ اعلیٰ معیار کے مطابق جلد از جلد مکمل کیے جائیں۔
کمشنر میرپور ڈویژن نے اس عزم کا اظہار کیا کہ گرین بس سروس حکومت کے عوام دوست وژن کا ایک انتہائی بنیادی اور اہم حصہ ہے، جس کا واحد مقصد خطے کے شہریوں کو جدید، محفوظ، آرام دہ اور باوقار سفری سہولیات فراہم کرنا ہے تاکہ مجموعی طور پر شہری ٹرانسپورٹ کے نظام کو جدید خطوط پر استوار کر کے بہتر بنایا جا سکے۔
