پاکستان مسلم لیگ (ن) کے نو منتخب امیدوارِ اسمبلی ثاقب مجید کامیابی حاصل کرنے کے بعد پہلی بار اپنے حلقے میں پہنچ گئے، جہاں مختلف مقامات پر کارکنان اور عوام کی جانب سے ان کا پرتپاک استقبال کیا گیا۔
حلقے میں آمد کے موقع پر ثاقب مجید نے کھاوڑہ کوٹ ترہالہ واقعے اور حالیہ تصادم کے بعد امن و امان کی صورتحال کا جائزہ لیا۔ اس موقع پر ان کی موجودگی میں ایک خاص امن و امان کمیٹی تشکیل دے دی گئی، جس کا بنیادی مقصد علاقے میں کشیدگی کا خاتمہ، دونوں فریقین کے درمیان امن و بھائی چارے کا فروغ اور آئندہ ایسے کسی بھی ناخوشگوار واقعے کی روک تھام کے لیے فعال کردار ادا کرنا ہے۔
متاثرہ بازار کا دورہ اور تاجروں سے ملاقات:
پاکستان مسلم لیگ (ن) کے نو منتخب امیدوارِ اسمبلی ثاقب مجید نے کوٹ تارلہ بازار کا تفصیلی دورہ کیا، جہاں حالیہ تصادم کے دوران متعدد دکانیں اور دیگر املاک جل کر شدید متاثر ہوئی تھیں۔ ثاقب مجید نے متاثرہ علاقوں کا معائنہ کیا اور مقامی تاجروں و متاثرین سے ملاقات کر کے ان کے مسائل اور مالی نقصانات کی معلومات حاصل کیں۔ انہوں نے متاثرین سے دلی ہمدردی کا اظہار کرتے ہوئے علاقے میں مکمل امن و امان کے قیام اور تمام متاثرہ خاندانوں کی بحالی کے لیے ہر ممکن تعاون کی یقین دہانی کرائی۔
یہ بھی پڑھیں: مظفر آباد: ایل اے 31 کھاوڑہ 5 سے ن لیگ کے راجہ ثاقب مجید پہلی بار اسمبلی کے رکن منتخب
جاں بحق افراد کے لواحقین سے تعزیت:
نو منتخب رکنِ اسمبلی ثاقب مجید نے اپنے حلقے کے اس افسوسناک تصادم کے دوران جاں بحق ہونے والے افراد کے گھروں کا بھی دورہ کیا اور غمزدہ لواحقین سے تعزیت کی۔ انہوں نے مرحومین کے ایصالِ ثواب کے لیے فاتحہ خوانی کی اور متاثرہ خاندانوں کے ساتھ دکھ کا اظہار کیا۔ واضح رہے کہ کوٹ تارلہ بازار میں تصادم کے دوران جلائی جانے والی دکانوں اور عمارتوں کے مناظر انتہائی افسوسناک ہیں اور آگ کی وجہ سے کئی کاروباری مراکز اور املاک کو شدید نقصان پہنچا ہے۔
امن و بھائی چارے کا پیغام
امن کمیٹی کی تشکیل کے موقع پر ثاقب مجید نے اہم پیغام دیتے ہوئے کہا کہ دونوں برادریوں کے درمیان ہر صورت امن و بھائی چارہ قائم کیا جائے گا اور کسی بھی قسم کا مزید نقصان نہیں ہونے دیا جائے گا۔ دوسری جانب کھاوڑہ گجر برادری کی نمائندگی کرتے ہوئے چوہدری شفقت ایڈووکیٹ نے کہا کہ کھاوڑہ مختلف برادریوں کا ایک خوبصورت گلدستہ ہے اور ہم کسی بھی شخص کو اپنے علاقے کے امن، بھائی چارے اور خوشحالی کو تباہ کرنے کی اجازت ہرگز نہیں دیں گے۔
