مظفرآباد: آزاد جموں و کشمیر کے انتخابی حلقہ ایل اے-28 مظفرآباد-2 لچھراٹ کا باضابطہ اور سرکاری نتیجہ جاری کر دیا گیا ہے، جس کے تحت ریٹرننگ آفیسر نے فارم 27 (ریٹرن آف الیکشن) جاری کر دیا ہے۔
مظفرآباد کے اس اہم حلقے سے پاکستان پیپلز پارٹی آزاد کشمیر کے امیدوار سید باذل علی نقوی نے 28,214 ووٹ حاصل کر کے شاندار کامیابی حاصل کی ہے۔ ریٹرننگ آفیسر کی جانب سے جاری کردہ فارم 27 کے مطابق سید باذل علی نقوی کو باضابطہ طور پر قانون ساز اسمبلی کا رکن منتخب قرار دے دیا گیا ہے۔
یہ بھی پڑھیں: مظفر آباد: ایل اے 28 کے 120 پولنگ اسٹیشنز کے نتائج جاری، بازل نقوی کو 5 ووٹوں کی برتری
دونوں نمایاں امیدواروں کا انتخابی معرکہ:
اس حلقے میں سخت انتخابی مقابلے کے بعد پاکستان مسلم لیگ (ن) کے امیدوار چوہدری شہزاد محمود 26,866 ووٹ لے کر دوسرے نمبر پر رہے۔
سرکاری فارم 27 کے اعداد و شمار کے مطابق، پیپلز پارٹی کے فاتح امیدوار سید باذل علی نقوی نے اپنے مدِ مقابل مسلم لیگ (ن) کے چوہدری شہزاد محمود کو 1,348 ووٹوں کے واضح فرق سے شکست دے کر یہ نشست اپنے نام کر لی ہے۔
ووٹس کی مجموعی تفصیلات اور دیگر نتائج:
ریٹرننگ آفیسر کی جانب سے جاری دستاویزات کے مطابق حلقہ ایل اے-28 مظفرآباد-2 لچھراٹ میں کاسٹ کیے گئے کل درست ووٹوں کی تعداد 58,985 رہی۔
اس انتخابی معرکے کے دوران مسترد ہونے والے ووٹوں کی کل تعداد 1,125 ریکارڈ کی گئی، جبکہ ٹینڈرڈ ووٹس کی تعداد صفر رہی۔ حلقے کے دیگر تمام آزاد و حزبی امیدواروں کے نتائج کے مکمل گوستوارے بھی اس رسمی فارم 27 کے ذریعے جاری کر دیے گئے ہیں۔
