پاکستان کرکٹ بورڈ (پی سی بی) نے آئندہ سال ہونے والے آئی سی سی کرکٹ ورلڈ کپ 2027ء کی تیاریوں کے لیے ایک بڑے اور اہم ترین ڈومیسٹک ون ڈے ٹورنامنٹ کا شیڈول تیار کرلیا ہے۔
شائقین کرکٹ کے دلوں کی دھڑکنیں تیز کرنے والا یہ 4 ٹیموں پر مشتمل ٹورنامنٹ آئندہ ماہ 11 سے 18 اگست تک ملتان کے تاریخی میدان پر کھیلا جائے گا۔
یہ بھی پڑھیں:جدہ میں جدید کرکٹ سٹیڈیم کی تعمیر،پی سی بی کیساتھ معاہدہ طے
اس اہم معرکے میں شرکت پاکستان کے تمام مایہ ناز اور مرکزی وائٹ بال کرکٹرز کے لیے لازمی قرار دی گئی ہے تاکہ ورلڈ کپ جیسے بڑے ایونٹ سے قبل ملک کے بہترین ٹیلنٹ کو ایک انتہائی مسابقتی ماحول میں پرکھا جاسکے۔
پی سی بی کے ڈائریکٹر ہائی پرفارمنس عاقب جاوید کا اس حوالے سے کہنا ہے کہ چونکہ ورلڈ کپ میں اب تقریباً 18 ماہ کا وقت رہ گیا ہے، اس لئےتیاریوں کے باقاعدہ آغاز کے لیے یہ بالکل موزوں ترین وقت ہے۔
انہوں نے انکشاف کیا کہ قومی سلیکٹرز اور کوچنگ اسٹاف نے سر جوڑ کر ایک ایسی حکمتِ عملی تیار کی ہے جس کے تحت چار انتہائی متوازن ٹیمیں میدان میں اتاری جائیں گی۔
دلچسپ بات یہ ہے کہ ہر میچ کے لیے پلیئنگ الیون کا فیصلہ بھی سلیکٹرز اور کوچز خود کریں گے تاکہ کھلاڑیوں کو ان کے مخصوص کردار کے مطابق جانچا جا سکے اور مستقبل کے لیے ایک مضبوط ترین بنیادی اسکواڈ فائنل کیا جا سکے۔
دوسری جانب یہ ٹورنامنٹ ان پاکستانی کھلاڑیوں کے لیے بھی بڑی اہمیت کا حامل ہے جو ویسٹ انڈیز کی مشہور لیگ، کیریبین پریمیئر لیگ(سی پی ایل) کا حصہ ہیں۔
سی پی ایل کا آغاز 7 اگست سے ہورہا ہے، تاہم پی سی بی نے اس بات کو یقینی بنایا ہے کہ جیسے ہی 18 اگست کو ملتان کا یہ ٹورنامنٹ اپنے اختتام کو پہنچے گا۔
یہ بھی پڑھیں:سینٹرل کنٹریکٹ کے تحت کھلاڑیوں کو کتنی رقم ملےگی؟ مسودہ تیار کرلیاگیا
ویسے ہی صائم ایوب، عثمان خان، صاحبزادہ فرحان اور سفیان مقیم سمیت تمام اہل کھلاڑیوں کو لیگ کے بقیہ میچز کھیلنے کے لیے فوری طور پر این او سی جاری کردئیے جائیں گے۔
اس طرح کھلاڑیوں کی قومی ذمہ داریاں بھی پوری ہو سکیں گی اور وہ بین الاقوامی لیگز میں بھی اپنا لوہا منوا سکیں گے۔
