صدر پاکستان پیپلز پارٹی آزاد کشمیر چوہدری محمد یاسین نے حلقہ کھوئی رٹہ سے پاکستان پیپلز پارٹی کے نامزد امیدوار محمد ولید انقلابی کی انتخابی مہم کا باضابطہ آغاز کر دیا ہے۔ اس موقع پر منعقدہ ایک بڑے اور تاریخی عوامی اجتماع میں پارٹی کارکنان، عہدیداران اور مقامی شہریوں کی کثیر تعداد نے شرکت کر کے یکجہتی کا اظہار کیا، جبکہ شرکاء سے چوہدری محمد یاسین، امیدوار اسمبلی محمد ولید انقلابی اور دیگر سینئر رہنماؤں نے تفصیلی خطاب کیا۔
اپنے خطاب میں چوہدری محمد یاسین نے کہا کہ محمد ولید انقلابی میرے شہید بھائی اور دیرینہ ساتھی محمد مطلوب انقلابی کے فرزند ہیں۔ انہوں نے اس بات پر زور دیا کہ شہید محمد مطلوب انقلابی کے ساتھ مل کر انہوں نے دہائیوں تک مظلوم، بے سہارا اور کمزور طبقات کے حقوق کی جدوجہد کی ہے، جس کی بنیاد عوامی خدمت، قربانی اور وفاداری پر قائم ہے۔
یہ بھی پڑھیں: مظفرآباد کی سیاست میں بڑا الٹ پھیر ،پی ٹی آئی سٹی صدر شازیہ اعوان پیپلز پارٹی میں شامل
ولید انقلابی میرا تیسرا بیٹا ہے:
چوہدری محمد یاسین نے جذباتی انداز میں کہا کہ محمد ولید انقلابی میرا تیسرا بیٹا ہے۔ انہوں نے اہلیانِ کھوئی رٹہ سے پرزور اپیل کی کہ وہ ولید انقلابی کو اپنا بیٹا، اپنا بھائی اور شہید محمد مطلوب انقلابی کی نشانی سمجھتے ہوئے ان کی انتخابی مہم کو گھر گھر پہنچائیں، زیادہ سے زیادہ لوگوں تک پارٹی کا پیغام پہنچائیں اور بھاری اکثریت سے کامیاب کرائیں تاکہ وہ عوام کی خدمت اور علاقے کی ترقی کے مشن کو آگے بڑھا سکیں۔
پیپلز پارٹی کی سیاست کا مقصد:
انہوں نے واضح کیا کہ پاکستان پیپلز پارٹی ہمیشہ عوامی خدمت، جمہوریت، ترقی اور محروم طبقات کے حقوق کی سیاست پر پختہ یقین رکھتی ہے۔ ان کا کہنا تھا کہ ان شاء اللہ عوام کے بھرپور تعاون اور جوش و خروش سے کھوئی رٹہ سمیت پورے آزاد کشمیر میں پاکستان پیپلز پارٹی شاندار کامیابی حاصل کرے گی۔
اجتماع کے اختتام پر کارکنوں نے بھرپور جوش و خروش کا اظہار کرتے ہوئے انتخابی مہم کو تیز کرنے، گھر گھر رابطہ مہم چلانے اور پارٹی امیدوار محمد ولید انقلابی کی کامیابی کے لیے بھرپور کردار ادا کرنے کے عزم کا اعادہ کیا۔
