مظفرآباد:آزاد جموں و کشمیر کے عام انتخابات 2026 کے لیے ٹکٹوں کی تقسیم اور انتخابی گہما گہمی کے درمیان دارالحکومت مظفرآباد میں ایک اور اہم سیاسی پیش رفت سامنے آئی ہے۔ انتخابی دنگل میں تیزی سے ابھرتی ہوئی سیاسی قوت “استحکامِ پاکستان پارٹی” (IPP) نے ایک اور اہم نشست پر اپنے امیدوار کا فیصلہ کرتے ہوئے نوجوان قیادت پر اعتماد کا اظہار کر دیا ہے۔
تازہ ترین تفصیلات کے مطابق، استحکامِ پاکستان پارٹی کی اعلیٰ قیادت نے حلقہ ایل اے 43 (LA-43) سے نوجوان اور متحرک سیاسی رہنما حمزہ بزمی کو باقاعدہ طور پر پارٹی کا انتخابی ٹکٹ جاری کر دیا ہے۔ حمزہ بزمی کو ٹکٹ ملنے کے بعد حلقے کے نوجوانوں اور پارٹی کارکنوں میں خوشی کی لہر دوڑ گئی ہے اور انہوں نے انتخابی مہم کا آغاز کر دیا ہے۔
یہ بھی پڑھیں: آزاد کشمیر انتخابات ؛ جموں 2 سے چوہدری قدیر کو استحکامِ پاکستان پارٹی کا ٹکٹ جاری
پاکستان ہے تو ہماری سیاست بھی ہے: حمزہ بزمی:
پارٹی ٹکٹ ملنے کے اس اہم موقع پر میڈیا سے گفتگو کرتے ہوئے نوجوان رہنما حمزہ بزمی کا کہنا تھا کہ یہ ان کی خوش قسمتی ہے کہ انہیں استحکامِ پاکستان پارٹی جیسی محبِ وطن جماعت کا ٹکٹ ملا ہے، جس کا نام ہی مملکتِ خداداد پاکستان کی مضبوطی اور استحکام سے جڑا ہوا ہے۔ انہوں نے دوٹوک الفاظ میں کہا کہ پاکستان ہے تو ہماری سیاست بھی ہے، اور پاکستان کی ترقی و بقا ہی ہماری سب سے بڑی ترجیح ہے۔
حلقے کی صورتحال پر بات کرتے ہوئے حمزہ بزمی نے کہا کہ ایل اے 43 کافی طویل عرصے سے شدید پسماندگی کا شکار رہا ہے اور ماضی میں یہاں کے عوامی مسائل کو نظرانداز کیا گیا ہے۔ انہوں نے عزم کا اظہار کرتے ہوئے کہا کہ اگر اللہ رب العزت نے انہیں انتخابی میدان میں کامیابی عطا کی، تو وہ ترجیحی بنیادوں پر ایل اے 43 کے غیور عوام کے تمام دیرینہ مسائل کو ختم کریں گے اور حلقے میں ترقی کے ایک نئے دور کا آغاز کریں گے۔
