اسلام آباد: اٹلی نے آئندہ تین برسوں کے لیے پاکستانی ورکرز کے لیے 10,500 کا خصوصی کوٹہ مختص کر دیا ہے جبکہ تعلیمی سال 26-2025 کے لیے 3,200 سے زائد طالب علموں کو ویزے جاری کیے گئے ہیں۔ اسلام آباد میں اطالوی یومِ قومی اور یومِ جمہوریہ کی 80 ویں سالگرہ کی تقریب سے خطاب کرتے ہوئے اطالوی سفیر ماریلینا ارمیلی نے دونوں ممالک کے مابین بڑھتے ہوئے تعاون کی توثیق کی ہے۔
اطالوی سفیر ماریلینا ارمیلی نے کہا کہ یورپین یونین میں اٹلی سب سے بڑی پاکستانی کمیونٹی کی میزبانی کر رہا ہے، جس کی وجہ سے ہجرت اور امیگریشن دونوں ممالک کے درمیان تعاون کا ایک انتہائی اہم شعبہ بن چکا ہے۔ گزشتہ سال دستخط کیے گئے دوطرفہ ہجرت کے معاہدے (میگریشن میمورنڈم) پر عمل درآمد شروع ہو چکا ہے جس کے تحت اٹلی نے اگلے تین سالوں میں 10,500 پاکستانی کارکنوں کے داخلے کا خصوصی کوٹہ محفوظ کیا ہے۔ اس قانونی طریقہ کار کو محفوظ بنانے اور کارکنوں کی مہارت بڑھانے کے لیے روانگی سے قبل تربیتی پروگرام بھی شروع کیے گئے ہیں۔
یہ بھی پڑھیں: بیرونِ ملک روزگار اور شہریوں کے سفر سے متعلق اسلام آباد ہائیکورٹ کا تاریخی فیصلہ!
تعلیمی اور تجارتی شعبوں میں شراکت داری:
تعلیم کے میدان میں پاکستان اور اٹلی کے تعلقات تیزی سے آگے بڑھ رہے ہیں، جس کا اندازہ اس بات سے لگایا جا سکتا ہے کہ تعلیمی سال 26-2025 کے دوران انڈر گریجویٹ، پوسٹ گریجویٹ اور پی ایچ ڈی پروگراموں کے لیے 3,200 سے زائد پاکستانی طلبہ کے ویزے پروسیس کیے گئے ہیں۔ اقتصادی محاذ پر پاکستان کی حالیہ معاشی ترقی نے اطالوی کاروباری برادری کی توجہ حاصل کی ہے، جس کا واضح ثبوت میلان میں ہونے والی حالیہ سفیروں کی کانفرنس میں دیکھا گیا جہاں اطالوی کمپنیوں نے پاکستان میں سرمایہ کاری کے مواقع تلاش کیے۔ گزشتہ سال کے دوران دفاع اور ٹیکنالوجی کے شعبوں میں اہم تجارتی معاہدوں پر دستخط بھی کیے گئے ہیں۔
زراعت، ماحولیاتی تبدیلی اور ثقافتی روابط:
اطالوی سفارت خانے کی جانب سے زراعت اور موسمیاتی تبدیلی کے شعبوں میں پاکستان کی ضروریات کو پورا کرنے کے لیے اٹلی کے تجربات سے فائدہ اٹھایا جا رہا ہے، جس کے تحت سندھ میں ماحولیاتی لچک اور زرعی ترقی کے منصوبے جاری ہیں۔ تقریب میں آنے والے مہمانوں کو زیتون کے تیل کی چھوٹی بوتلیں تحفے میں دی گئیں جو کہ پائیدار ترقی کے منصوبوں کی علامت ہیں۔ سفیر نے پاکستان میں موجود تمام یونیسکو عالمی ثقافتی ورثہ کے مقامات کا دورہ کیا اور عالمی سطح پر پاکستان کے ثقافتی تشخص کو فروغ دینے کے لیے اٹلی کے مسلسل تعاون کا اعادہ کیا۔
مشرقِ وسطیٰ میں امن کوششیں اور عالمی اعتراف:
سیاسی اور سفارتی تعلقات کے حوالے سے اطالوی سفیر نے مشرقِ وسطیٰ میں امن کے قیام کے لیے پاکستان کی سفارتی کوششوں کو زبردست الفاظ میں سراہا۔ انہوں نے واضح کیا کہ اطالوی وزیر اعظم جارجیا میلونی نے پاکستان کی ان سفارتی کوششوں کی عوامی سطح پر کھل کر حمایت کی ہے۔ اس کے علاوہ اٹلی کے ایک بڑے معتبر اخبار نے پاکستان کے اس اہم ترین کردار کو لاطینی سرخی “Islamabada Caput Mundi” کے ساتھ شائع کیا، جس کا مطلب “اسلام آباد، دنیا کا دارالحکومت” ہے۔
مزید پڑھیں: گزشتہ 4 ماہ میں اڑھائی لاکھ پاکستانی روزگار کیلئے بیرون ملک منتقل
اطالوی جمہوریہ کی 80 ویں سالگرہ کے موقع پر منعقدہ اس تقریب میں چیئرمین سینیٹ یوسف رضا گیلانی اور وزیر پیٹرولیم علی پرویز ملک نے بطور مہمانِ خصوصی شرکت کی۔ تقریب میں جدید اٹلی کی تشکیل میں کردار ادا کرنے والی خواتین کی نمائش کی گئی اور پاکستان کو اپنا گھر بنانے والی اطالوی آرٹسٹ فیڈریکا فونٹانا کے فن پارے بھی پیش کیے گئے۔ رخصت ہونے والی اطالوی سفیر نے اسلام آباد میں اٹلی کے نئے سفارتی کمپاؤنڈ کی تعمیر کو دونوں ممالک کے درمیان پائیدار دوستی کی علامت قرار دیا۔
