چیف آف ڈیفنس فورسز فیلڈ مارشل عاصم منیر نے واشگاف الفاظ میں اعلان کیا ہے کہ ملک بھر میں پائیدار امن اور استحکام کے حصول تک دہشت گردی کے خلاف جنگ پوری قومی قوت کے ساتھ جاری رہے گی۔ یہ بات انہوں نے جنرل ہیڈ کوارٹرز (جی ایچ کیو) راولپنڈی میں پاک فوج کے افسران اور جوانوں کو عسکری اعزازات دینے کی ایک پروقار تقریبِ تقسیمِ اسناد سے خطاب کرتے ہوئے کہی۔
پاک فوج کے شعبہ تعلقات عامہ (آئی ایس پی آر) کے مطابق راولپنڈی میں واقع جنرل ہیڈ کوارٹرز (جی ایچ کیو) میں پاک فوج کے افسران اور جوانوں کو عسکری اعزازات سے نوازنے کے لیے ایک پروقار تقریبِ تقسیمِ اسناد کا انعقاد کیا گیا۔ چیف آف ڈیفنس فورسز فیلڈ مارشل سید عاصم منیر نے بطور مہمانِ خصوصی اس تقریب میں شرکت کی اور شہداء کے اہلِ خانہ، افسران اور جوانوں کو آپریشنز میں دکھائی جانے والی غیر معمولی بہادری اور ملک و قوم کے لیے انجام دی جانے والی نمایاں خدمات کے اعتراف میں عسکری اعزازات سے نوازا۔
یہ بھی پڑھیں: فیلڈ مارشل کے دورہ تہران سے متعلق سوشل میڈیا پر بھارتی پروپیگنڈا بے نقاب، خبریں جعلی نکلیں
اس پروقار تقریب کے دوران مجموعی طور پر 50 ستارۂ امتیاز (ملٹری) اور 12 تمغۂ بسالت عطا کیے گئے۔ جامِ شہادت نوش کرنے والے پاک فوج کے عظیم سپوتوں کو بعد از شہادت دیے جانے والے تمغے اور عسکری اعزازات ان کے اہلِ خانہ نے انتہائی فخر، بڑے وقار اور عزت کے ساتھ وصول کیے۔
تقریب سے خطاب کرتے ہوئے شہداء اور غازیوں کو شاندار الفاظ میں خراجِ عقیدت پیش کرتے ہوئے فیلڈ مارشل سید عاصم منیر نے کہا کہ “شہداء اور غازی قوم کا دائمی فخر ہیں، ان کی عزت اور قربانی ہر پاکستانی کے لیے ایک مقدس امانت ہے۔ ہمارے وطنِ عزیز کا امن اور سلامتی انہی کی عظیم قربانیوں اور فرض سے بے لوث وابستگی کا نتیجہ ہے۔”
فیلڈ مارشل نے دورانِ خطاب شہداء کے اہلِ خانہ کی استقامت، وقار اور ثابت قدمی کو بھی زبردست خراجِ تحسین پیش کیا اور وطنِ عزیز سے ان کی بے مثال قربانیوں اور غیر متزلزل وابستگی کو بھرپور طریقے سے سراہا۔
چیف آف ڈیفنس فورسز فیلڈ مارشل سید عاصم منیر نے پاک فوج اور قانون نافذ کرنے والے دیگر تمام اداروں کی عملی تیاری اور غیر متزلزل عزم کو سراہتے ہوئے دہشت گردوں کے خلاف ان کی مسلسل اور پائیدار کوششوں کی تعریف کی۔
انہوں نے اس پختہ عزم کا اعادہ کیا کہ ملک بھر میں مستقل و پائیدار امن اور استحکام کے مکمل حصول تک دہشت گردی کے خلاف دھرتی کے بیٹوں کی یہ جنگ پوری قومی قوت، اتحاد اور جرات کے ساتھ مسلسل جاری رہے گی اور ملک دشمن عناصر کا قلع قمع کیا جائے گا۔
