واشنگٹن : وائٹ ہاؤس کوریسپونڈنٹس ڈنر کے دوران اچانک اس وقت بدمزگی کی صورت حال پیدا ہوگئی جب تقریب میں فائرنگ کی آواز سنی گئی، جس پر ہال میں موجود شرکاء میں بے چینی پھیل گئی اور سکیورٹی اہلکار فوری طور پر متحرک ہوگئے ۔ واقعہ واشنگٹن ڈی سی کے ہلٹن ہوٹل میں پیش آیا، جہاں یہ سالانہ تقریب منعقد کی جا رہی تھی ۔
میڈیا رپورٹس کے مطابق آواز سنائی دینے کے فوراً بعد سیکرٹ سروس کے اہلکاروں نے سابق صدر ڈونلڈ ٹرمپ کو حفاظتی حصار میں لے کر ہال سے باہر منتقل کردیا ۔ ان کے ہمراہ موجود میلانیا ٹرمپ کو بھی فوری طور پر محفوظ مقام پر پہنچایا گیا ۔ تقریب میں موجود دیگر اہم شخصیات، جن میں اسپیکر مائیک جانسن اور نائب صدر جے ڈی وینس شامل تھے، کو بھی احتیاطی تدابیر کے تحت باہر نکال لیا گیا ۔
عینی شاہدین کے مطابق تقریب کے آغاز کے کچھ ہی دیر بعد ٹرمپ اور ان کے قریب بیٹھے افراد کو ایک پرچی دی گئی، جس کے بعد ان کے چہروں پر تشویش دیکھی گئی۔ اسی دوران اچانک ایک تیز آواز گونجی، جسے بعض افراد نے فائرنگ قرار دیا، تاہم اس حوالے سے فوری طور پر کوئی باضابطہ تصدیق سامنے نہیں آئی ۔
ابتدائی اطلاعات میں متضاد دعوے سامنے آئے، جن میں مبینہ حملہ آور کے ہلاک یا گرفتار ہونے کی خبریں شامل تھیں ۔ بعد ازاں ٹرمپ کی جانب سے کہا گیا کہ مشتبہ شخص کو گرفتار کرلیا گیا ہے اور وہ زندہ ہے ۔ واقعے کے بعد سکیورٹی حکام نے ہال کو خالی کروا کر مکمل جانچ پڑتال شروع کردی ۔
حکام نے اعلان کیا کہ سکیورٹی کلیئرنس کے بعد تقریب کو دوبارہ شروع کیا جائے گا، تاہم اس غیر متوقع واقعے نے شرکاء میں خوف و ہراس کی فضا پیدا کردی ۔
