وفاقی وزیرِ مملکت برائے خزانہ بلال اظہر کیانی نے عوام کو مہنگائی سے ریلیف دینے کے حوالے سے بڑی نوید سناتے ہوئے کہا ہے کہ ڈیزل کے بعد اب پیٹرول کی قیمت میں بھی کمی کا قوی امکان ہے۔ کراچی میں تاجر برادری سے گفتگو کرتے ہوئے انہوں نے عندیہ دیا کہ آئندہ جمعہ کو پیٹرولیم مصنوعات کی قیمتوں میں کمی کا فیصلہ کیا جا سکتا ہے۔
وزیرِ مملکت نے واضح کیا کہ قیمتوں میں کمی کا یہ فیصلہ عالمی منڈی میں تیل کی قیمتوں کے تناظر میں کیا جائے گا، جس کا مقصد براہِ راست عام آدمی کو فائدہ پہنچانا ہے۔ انہوں نے مزید کہا کہ مشرقِ وسطیٰ میں حالیہ جنگ بندی کے مثبت اثرات عالمی اور ملکی معیشت پر مرتب ہو رہے ہیں، اور حکومت اس استحکام کو عوامی ریلیف کے لیے استعمال کرنے کے لیے پرعزم ہے۔
یہ بھی پڑھیں: پیٹرول کی قیمتوں میں اتنا اضافہ ہوگا کہ موجودہ ریٹس نعمت لگیں گے، ایرانی اسپیکر کی وارننگ
بلال اظہر کیانی کا کہنا تھا کہ پاکستان چار سال کے طویل وقفے کے بعد دوبارہ عالمی مالیاتی منڈیوں میں جگہ بنانے میں کامیاب ہوا ہے، جو ملکی معیشت کی بحالی کی جانب ایک اہم سنگ میل ہے۔
مزید پڑھیں: جرمنی میں پاکستانیوں کے لیے ملازمتوں کے مواقع، اسناد کی تصدیق لازمی قرار
معاشی ماہرین کے مطابق، اگر پیٹرول کی قیمتوں میں کمی ہوتی ہے تو اس سے نہ صرف ٹرانسپورٹ کے اخراجات کم ہوں گے بلکہ اشیائے ضروریہ کی قیمتوں میں بھی کمی آئے گی، جس سے عام شہریوں کو بڑی راحت ملے گی۔
