اسلام آباد: پاکستان تحریک انصاف کے رہنما بیرسٹر گوہر علی خان کا واٹس ایپ اکاؤنٹ ہیک کر لیا گیا ہے، جس کے بعد ہیکر نے ان کے جاننے والوں سے مالی مطالبات شروع کر دیے ہیں۔ اس سنگین سائبر حملے کے بعد بیرسٹر گوہر نے اپنے تمام رابطوں کو فوری طور پر ہوشیار رہنے کی ہدایت کی ہے۔
بیرسٹر گوہر نے اپنے بیان میں تصدیق کی کہ ان کا واٹس ایپ ہیک ہو چکا ہے۔ انہوں نے بتایا، “میں نے ایف آئی اے (FIA) کو رپورٹ کر دیا ہے اور یوفون انتظامیہ کو بھی مطلع کر دیا ہے۔ اس کے علاوہ واٹس ایپ حکام کو بھی ای میل کر دی گئی ہے۔” انہوں نے مزید کہا کہ جیسے ہی انہیں اکاؤنٹ ہیک ہونے کا علم ہوا، انہوں نے فوری طور پر اپنے موبائل سے واٹس ایپ ایپلیکیشن ڈیلیٹ (Delete) کر دی ہے۔
بیرسٹر گوہر کا کہنا ہے کہ “اگرچہ میرے فون میں ایسی کوئی چیز (ذاتی ڈیٹا) نہیں تھی، لیکن اس اکاؤنٹ میں بہت سارے گروپس تھے جن میں انتہائی حساس معلومات موجود تھیں۔” انہوں نے خدشہ ظاہر کیا کہ ہیکرز ان گروپس تک رسائی حاصل کر کے ڈیٹا کا غلط استعمال کر سکتے ہیں۔
یہ بھی پڑھیں: چوہدری اسحاق طاہر مرحوم کی فیملی پیپلز پارٹی میں شامل، پی ٹی آئی کو بڑا دھچکا
بیرسٹر گوہر نے اپنے تمام رابطوں اور عوام کو خبردار کیا ہے کہ ہیکر ان کے نام پر پیسے طلب کر رہا ہے، لہٰذا کسی بھی مشکوک پیغام یا مالی درخواست پر عمل نہ کیا جائے۔ وہ اپنے ڈیجیٹل اکاؤنٹس کی سیکیورٹی بڑھانے کے لیے مزید اقدامات کر رہے ہیں اور سیکیورٹی اداروں کو بھی واقعے کی مکمل اطلاع دے دی گئی ہے۔
