نیلم (کشمیر ڈیجیٹل): ملین سمائلز فاؤنڈیشن کے زیرِ اہتمام ضلع نیلم کے علاقے دودھنیال میں انسانی ہمدردی کے جذبے کے تحت ایک پروقار تقریب کا انعقاد کیا گیا، جس میں رمضان المبارک کی آمد کے موقع پر 150 مستحق خاندانوں میں راشن پیکجز تقسیم کیے گئے۔
راشن کی تقسیم کی اس تقریب میں کمانڈنگ آفیسر لیفٹیننٹ کرنل عابد علی اور فاؤنڈیشن کے ریجنل ڈائریکٹر راجہ محمد داؤد خان نے خصوصی طور پر شرکت کی اور مشترکہ طور پر ضرورت مند خاندانوں میں امداد تقسیم کی۔
راشن پیکج کی تفصیلات اور اغراض و مقاصد:
مستحقین میں تقسیم کیے گئے راشن پیکجز میں آٹا، مختلف اقسام کی دالیں، چینی، چاول، بیسن، کھجوریں، مشروبِ مشرق (روح افزا)، نمک، کوکنگ آئل اور سرخ مرچ شامل تھی، تاکہ یہ خاندان ماہِ صیام میں اپنی بنیادی غذائی ضروریات کسی کے سامنے ہاتھ پھیلائے بغیر باعزت طریقے سے پوری کر سکیں۔ تقریب سے خطاب کرتے ہوئے ریجنل ڈائریکٹر راجہ محمد داؤد خان نے بتایا کہ فاؤنڈیشن رواں رمضان المبارک کے دوران پورے ضلع نیلم میں مجموعی طور پر 2000 خاندانوں تک راشن پہنچانے کا ہدف رکھتی ہے۔ ان کا کہنا تھا کہ اس مہم کا بنیادی مقصد غریب اور نادار افراد کو ریلیف فراہم کرنا ہے تاکہ وہ سحر و افطار کا بہتر اہتمام کر سکیں اور یکسوئی کے ساتھ اپنی عبادات پر توجہ دے سکیں۔
یہ بھی پڑھیں: وزیراعظم رمضان ریلیف پیکج: کیا آپ 13 ہزار روپے کے اہل ہیں؟ اپنی اہلیت چیک کرنے کا طریقہ جانیں
انسانی خدمت کا تسلسل اور اداروں کا تعاون:
راجہ محمد داؤد خان نے مزید کہا کہ ملین سمائلز فاؤنڈیشن ہمیشہ سے قدرتی آفات اور معاشی مشکلات کے دوران عوام کی خدمت میں پیش پیش رہی ہے اور مستقبل میں نیلم ویلی کے دور دراز اور پسماندہ علاقوں میں ان فلاحی سرگرمیوں کا دائرہ مزید پھیلایا جائے گا۔ انہوں نے تمام ڈونرز اور مخیر حضرات کا شکریہ ادا کیا جن کے مالی تعاون سے یہ مشن ممکن ہوا۔ اس کے علاوہ انہوں نے ضلعی اداروں اور بالخصوص پاک فوج کے کلیدی کردار کی تعریف کی جن کے تعاون سے راشن کی تقسیم کا عمل انتہائی منظم انداز میں مکمل ہوا۔ مقامی شہریوں اور امداد حاصل کرنے والے خاندانوں نے فاؤنڈیشن کی اس کاوش کو بے حد سراہا اور اسے رمضان المبارک میں ایک بڑی سہولت اور حوصلہ قرار دیا۔
