سعودی عرب کے مقدس شہر مدینہ منورہ میں ایک ایسی کہانی سامنے آئی ہے جس نے دیکھنے والوں کو جذباتی کر دیا۔ 55 سال تک مدینہ میں خدمات انجام دینے کے بعد پاکستان جانے والے پاکستانی شہری عبدالغفار نور محمد جب تین سال بعد دوبارہ مدینہ منورہ واپس پہنچے تو ایئرپورٹ پر ان کے استقبال کا منظر سوشل میڈیا پر وائرل ہو گیا۔ اس ملاقات میں عبدالغفار اور ان کے سعودی کفیل عدی محمد دقاق کی جذباتی کیفیت نمایاں تھی، جس نے دیکھنے والوں کے دل چھو لیے۔
عبدالغفار نور محمد کا تعلق پاکستان کے شہر نوابشاہ سے ہے۔ انہوں نے اپنی زندگی کے کئی دہائیاں مدینہ منورہ میں گزاریں اور یہاں کے ماحول، لوگوں اور روزمرہ زندگی سے گہرا تعلق قائم کر لیا۔ تاہم پاکستان میں خاندانی معاملات کے باعث انہیں تین سال قبل مدینہ چھوڑ کر وطن واپس جانا پڑا۔ عبدالغفار کے مطابق مدینہ سے رخصت ہونا ان کے لیے آسان نہیں تھا کیونکہ یہاں کی زندگی ان کے دل کے قریب تھی۔
’ہمارے لیے ملازم نہیں بلکہ خاندان کا حصہ ہیں‘ مدینہ، حرم اور بابِ جبریل سے عقیدت رکھنے والے پاکستانی ڈرائیور عبدالغفار چھ سال کی عمر میں سعودی عرب گئے اور گزشتہ 55 برس سے وہاں خدمات انجام دے رہے ہیں، جہاں سعودی خاندان کے ساتھ ان کی دوستی اور تعلق انسانیت اور بھائی چارے کی مثال ہے pic.twitter.com/xUovTnJEUX
— Urdu News (@UrduNewsCom) February 2, 2026
یہ بھی پڑھیں: ایرانی سفیر کی خطے میں کشیدگی پر سعودی عرب کے ’مدبرانہ موقف‘ کی بھرپور تعریف
گزشتہ ہفتے جب عبدالغفار دوبارہ مدینہ منورہ پہنچے تو ایئرپورٹ پر ان کے کفیل عدی محمد دقاق سے ملاقات ہوئی، جس کی ویڈیو سوشل میڈیا پر وائرل ہو گئی۔ ویڈیو میں دونوں کو ایک دوسرے سے ملتے وقت جذباتی دیکھا جا سکتا ہے۔ اس موقع پر عدی محمد دقاق نے اردو نیوز کو بتایا کہ عبدالغفار 55 سال قبل جب پہلی مرتبہ سعودی عرب آئے تھے تو وہ ان کے والد کی کفالت میں تھے۔
عدی محمد دقاق کا کہنا تھا کہ وہ بچپن سے عبدالغفار کو دیکھتے آ رہے ہیں اور وقت کے ساتھ یہ رشتہ محض ملازمت تک محدود نہیں رہا بلکہ عبدالغفار ان کے خاندان کا حصہ بن چکے ہیں۔ انہوں نے بتایا کہ پاکستان میں خاندانی معاملات کی وجہ سے عبدالغفار کو جانا پڑا تھا، تاہم اب ان کی واپسی پر انہیں دلی خوشی محسوس ہو رہی ہے۔
مزید پڑھیں:سعودی وزارت حج و عمرہ نے 1800 غیر ملکی ٹریول ایجنسیز کےخلاف بڑا اقدام اٹھا لیا
عبدالغفار نور محمد نے بھی اپنے جذبات کا اظہار کرتے ہوئے بتایا کہ مدینہ منورہ چھوڑ کر جانا ان کے لیے نہایت مشکل مرحلہ تھا۔ ان کے مطابق پاکستان میں خاندانی معاملات نمٹانے کے بعد اب وہ دوبارہ مدینہ منورہ پہنچ گئے ہیں، جس پر وہ خود کو خوش قسمت محسوس کر رہے ہیں۔ یہ کہانی برسوں پر محیط تعلق، اعتماد اور خلوص کی عکاس ہے، جس نے سوشل میڈیا پر لوگوں کی توجہ حاصل کی۔
