مظفرآباد : یونیورسٹی آف آزاد جموں و کشمیر (UAJK) نے اعلان کیا ہے کہ خصوصی ضرورتوں کے حامل طلبہ کوٹے کے تحت داخلہ لینے والے طلباء کو اب مفت ہاسٹل فراہم کیا جائے گا، یہ اقدام جامعہ میں شمولیت اور تعلیم تک مساوی رسائی کو فروغ دینے کے لیے کیا گیا ہے۔
یہ اقدام وائس چانسلر پروفیسر ناصر جمال خٹک کی منظوری سے کیا گیا ہے اور اسے باضابطہ طور پر اکیڈمک کونسل اور سینیڈیٹ کی توثیق کے بعد نافذ کیا جائے گا۔ یو اے جے کے حکام کے مطابق یہ اقدام جامعہ کی جاری کوششوں کا حصہ ہے جس کا مقصد مختلف صلاحیتوں کے حامل طلباء کے لیے معاون اور سازگار تعلیمی ماحول فراہم کرنا ہے۔ اس سال ترجیح خصوصی ضرورتوں کے حامل طلباء کو دی جائے گی تاکہ وہ جامعہ کی تعلیمی اور رہائشی سہولیات سے بھرپور فائدہ اٹھا سکیں۔
یہ بھی پڑھیں: موٹاپے کی دوا سےفارما کمپنی کی مارکیٹ ویلیو ٹریلین ڈالر تک پہنچ گئی
یو اے جے کے کے ترجمان نے کہا:”ہر طالب علم کی فلاح اور تعلیمی ترقی،چاہے وہ کسی بھی پس منظر یا صلاحیت سے تعلق رکھتا ہو—ہماری اولین ترجیح ہے۔ قابل رسائی اور معاون سہولیات فراہم کرنا ہماری شمولیتی تعلیم کے مشن کا مرکزی حصہ ہے۔”
اس فیصلے کا خیرمقدم طلباء، والدین اور سول سوسائٹی کے اراکین کی جانب سے کیا گیا ہے۔ طلبہ نے اسے ایک ترقی پسند اور مثبت اقدام قرار دیا، جبکہ والدین نے یونیورسٹی کی تعریف کی کہ اس نے مختلف صلاحیتوں کے حامل طلبہ کی مخصوص ضروریات کو مدنظر رکھا۔
یہ بھی پڑھیں: ملک کے مختلف علاقوں میں بارشوں اور برفباری کی پیشگوئی
ماہرین تعلیم نے نوٹ کیا کہ یہ اقدام نہ صرف مساوات کو فروغ دیتا ہے بلکہ یونیورسٹی کے سماجی ذمہ داری اور انسانی ہمدردی کے عزم کو بھی مضبوط کرتا ہے۔
یو اے جے کے نے اس بات پر زور دیا کہ وہ ایک شمولیتی تعلیمی ماحول فراہم کرنے، مساوی مواقع یقینی بنانے، اور تمام طلبہ کی مجموعی نشوونما اور ترقی کے لیے پرعزم ہے۔
