(کشمیر ڈیجیٹل) : پنجاب حکومت نے ای-ٹیکسی اسکیم 2025 کے لیے رجسٹریشن پورٹل کھول دیا ہے۔ حکومت نے اپنے سرکاری X (سابقہ ٹویٹر) اکاؤنٹ پر اعلان کیا کہ ای-ٹیکسی اسکیم 2025 کے لیے درخواستیں آج سے شروع ہو جائیں گی، جبکہ درخواست دینے کی آخری تاریخ اکتوبر 2025 مقرر کی گئی ہے۔
حکومت نے پہلے ہی اسکیم کے تحت قسط وار ادائیگی کے پلان اور بالوٹنگ شیڈول کا اعلان کیا تھا تاکہ نوجوانوں اور بے روزگار افراد کو روزگار کے مواقع فراہم کیے جا سکیں اور فضائی آلودگی پر قابو پایا جا سکے۔ ای-ٹیکسی اسکیم کا ایک اہم پہلو یہ ہے کہ سود سے پاک قسط وار ادائیگی کی سہولت کے ذریعے ڈرائیور آسان ادائیگیوں پر الیکٹرک ٹیکسی حاصل کر سکیں گے۔ اس پروگرام کے پہلے مرحلے میں 1,100 الیکٹرک ٹیکسیز منتخب ڈرائیورز کو دی جائیں گی، جس سے خاص طور پر شہروں میں ٹیکسی بزنس کو فروغ ملے گا۔
یہ منصوبہ نوجوانوں اور بے روزگار افراد کے لیے ایک مستحکم آمدنی کا ذریعہ بھی فراہم کرے گا۔ اسکیم میں شامل الیکٹرک ٹیکسیز کے ماڈلز میں Honri Ve 2.0 اور Dongfeng Box شامل ہیں، جو GPS سسٹمز، اسمارٹ میٹرز، اور منظور شدہ ای-ٹیکسی برانڈنگ کے ساتھ مسافروں کو محفوظ اور قابل اعتماد سروس فراہم کریں گے۔
ای-ٹیکسی اسکیم کے لیے اہلیت کے معیار:
• اسکیم پنجاب کے تمام رہائشیوں کے لیے دستیاب ہے، جو 18 سال یا اس سے زیادہ عمر کے ہوں، جائز ڈرائیونگ لائسنس رکھتے ہوں اور بینک ریکارڈ درست ہو۔
• دونوں صنفیں درخواست دے سکتی ہیں۔
• درخواستیں ستمبر 2025 سے آن لائن رجسٹریشن پورٹل کے ذریعے دی جا سکیں گی۔
درخواست جمع کرانے کی آخری تاریخ:
فارمز اور مطلوبہ دستاویزات جمع کرانے کی آخری تاریخ اکتوبر 2025 ہے۔
بالوٹنگ اور ویٹنگ کا عمل نومبر 2025 میں کیا جائے گا تاکہ مستحق افراد کا منصفانہ انتخاب یقینی بنایا جا سکے۔
منتخب امیدواروں میں الیکٹرک ٹیکسیز کی تقسیم دسمبر 2025 میں شروع ہو گی، جب یہ انقلابی منصوبہ باضابطہ طور پر شروع کیا جائے گا۔
ای-ٹیکسی قسطوں کی شرائط:
• تخمینہ قیمت: 6-6.5 ملین روپے
• ابتدائی ادائیگی (30%): 1.8-2 ملین روپے
• بینک فنانس (70%): 4.5 ملین روپے
• ماہانہ قسط (تخمینہ): 60,000 روپے
