(کشمیر ڈیجیٹل)ملک بھر میں یومِ دفاع و شہداء آج بھرپور جوش و جذبے کے ساتھ منایا جا رہا ہے۔ وطن عزیز کے دفاع کے لیے اپنی جانوں کا نذرانہ پیش کرنے والے شہداء اور غازیوں کو خراجِ عقیدت پیش کرنے کے لیے مختلف تقریبات جاری ہیں۔
یومِ دفاع کے موقع پر وفاقی دارالحکومت اسلام آباد میں 31 توپوں کی سلامی سے دن کا آغاز ہوا۔
وزیراعظم شہباز شریف نے اپنے پیغام میں کہا کہ 6 ستمبر ہماری قومی تاریخ میں بہادری، اتحاد اور عزم کا دن ہے، 1965 کا ناقابلِ تسخیر جذبہ آج بھی زندہ ہے۔ انہوں نے کہا کہ حالیہ معرکۂ حق میں ایک بار پھر مسلح افواج اور عوام آہنی دیوار ثابت ہوئے۔ فیلڈ مارشل عاصم منیر کے تزویراتی ویژن نے دشمن کا تکبر مٹا کر نئی تاریخ رقم کی۔ وزیراعظم نے بہادر شہداء کو خراجِ عقیدت پیش کیا اور کہا کہ بھارت کے زیرِ تسلط کشمیر کے مظلوم عوام کے ساتھ یکجہتی کا اعادہ کرتے ہیں، ساتھ ہی عالمی برادری پر زور دیتے ہیں کہ وہ اسرائیلی جارحیت کے خاتمے کے لیے کردار ادا کرے۔
ادھر فیلڈ مارشل عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نیول چیف اور ائیر چیف نے بھی 1965 کی جنگ کے شہداء کو خراجِ عقیدت پیش کیا ہے۔
یہ بھی پڑھیں: گوگل جرمانے پر ٹرمپ کی یورپی یونین کو اقتصادی پابندیوں کی دھمکی
پاک فوج کے شعبہ تعلقاتِ عامہ (آئی ایس پی آر) کے مطابق 6 ستمبر کے اس تاریخی دن ہمارے بہادر سپاہیوں نے قوم کی حمایت کے ساتھ کھڑے ہو کر کھلی جارحیت کا مقابلہ کیا۔ مسلح افواج نے اس دشمن کے مذموم عزائم کو ناکام بنایا جو ہتھیاروں اور تعداد میں کہیں زیادہ تھا۔ آئی ایس پی آر نے کہا کہ نڈر ہیروز کی جرات آج بھی آنے والی نسلوں کو حوصلہ دیتی ہے۔ پوری قوم اپنے شہداء، غازیوں اور ان کے اہلِ خانہ کو سلام پیش کرتی ہے۔ افواجِ پاکستان ہمیشہ بیرونی جارحیت اور دہشت گردی کے خلاف ڈٹ کر کھڑی رہیں گی۔
