سرینگر/اسلام آباد:قائد تحریک آزادی کشمیر شہید سید علی گیلانی کی تیسری برسی آج پیر کو منائی جا رہی ہے گی،لائن آف کنٹرول کے دونوں طرف خصوصی تقریبات ہوں گی ، جلسے جلوس ، ریلیاں اور سیمینارز منعقد ہونگے جن میںعظیم قائد کو خراج عقیدت پیش کیا جائے گا ۔
سید علی گیلانی کوخراج عقیدت پیش کرنے کیلئے کشمیری حیدر پورہ سرینگر میں قائد کے مزار پر جاکر فاتحہ خوانی کریں گے ۔
کل جماعتی حریت کانفرنس نے مزار شہدا حیدر پورہ کی طرف لوگوں کو اپنے عظیم قائد کو خراج عقیدت پیش کرنے کے لئے فاتحہ کرنے کی اپیل کی ہے جہاں سید علی گیلانی کی آخری آرام گاہ موجود ہے ۔
کل جماعتی حریت کانفرنس نے لوگوں سے اپیل کی ہے کہ وہ حیدر پورہ سرینگر میں سید علی گیلانی کی قبرپر جائیں اور شہید رہنما اور دیگر کشمیری شہدا ء کے لیے فاتحہ خوانی کریں۔
حریت کانفرنس نے ایک بیان میں ائمہ مساجد اور خطیبوں پر بھی زور دیا کہ وہ مساجد میں عظیم قائد اور دیگر کشمیری شہدا ء کے لیے خصوصی دعائیں کریں۔
بیان میں دنیا بھر میں مقیم کشمیریوں سے اپیل کی گئی کہ وہ مقبوضہ جموں و کشمیر میں بھارتی مظالم کی طرف عالمی برادری کی توجہ مبذول کرانے کے لیے اپنی آواز بلند کریں۔
کل جماعتی حریت کانفرنس نے کہا کہ” ہم پاکستانی ہیں، پاکستان ہمارا ہے” کا نعرہ سید علی گیلانی کے وژن کی علامت ہے۔ ان کے مشن کو آگے بڑھانا ہی ان کے لئے سب سے بڑا خراج عقیدت ہے۔
تحریک حریت جموں و کشمیر، جموں و کشمیر مسلم لیگ، پیپلز لیگ، جموں وکشمیرماس موومنٹ ینگ مینز لیگ اور دیگر حریت پسند تنظیموں نے سرینگر میں اپنے بیانات میں کہا کہ مسئلہ کشمیر پر سید علی گیلانی کے اصولی موقف سے انہیں بے مثال عزت و توقیر حاصل ہوئی اور بھارتی مظالم ان کے ساتھ کشمیری عوام کی عقیدت کم نہیں کرسکتے۔
آزاد کشمیر ،پاکستان سمیت دنیا بھر میںقائد حریت کو خراج عقیدت پیش کرنے کے لئے مختلف تقاریب ہونگی ،آزادکشمیرکے دارلحکومت مظفرآباد میںبھی مختلف تقاریب ہونگی جہاں ایک بڑی ریلی بھی نکالی جائے گی۔
پاکستان کے وفاقی دارلحکومت اسلام آباد میں حریت کانفرنس کے زیر اہتمام یادگار پاکستان پر سیدعلی گیلانی کارنر پر خصوصی تقریب ہوگی ۔
اس کے علاوہ کشمیر ہائوس اسلام آباد میں بھی قائد حریت کو خراج عقیدت پیش کرنے کے لئے ایک سیمینار ہوگا جس کی صدارت کنوینئر اے پی ایچ سی غلامحمد صفی کریں گے جس میں کشمیر ی اورپاکستانی رہنماء شریک ہونگے ،۔
اس کے علاوہ دنیا بھر کشمیری قائد کو خراج عقیدت پیش کرنے کے لئے مختلف تقاریب کا انعقاد کریں گے۔
سید علی گیلانی یکم ستمبر 2021کو سرینگر میں اپنی رہائش گاہ پر نظربندی کے دوران انتقال کر گئے جہاں انہیں ایک دہائی سے زائد عرصے تک مسلسل گھر میں نظر بند رکھا گیاتھا۔
