لندن (کشمیر ڈیجیٹل)پاکستان کی اسٹریٹ چلڈرن فٹبال ٹیم نے برطانیہ کا شاندار دورہ کیا ہے، جہاں ان بچوں نے اپنی صلاحیتوں اور ہمت کے ذریعے بین الاقوامی سطح پر پاکستان کا نام فخر سے بلند کیا۔
اس دورے کے دوران ٹیم نے انگلش پریمیئر لیگ کے بہترین کلبوں کی فاؤنڈیشن ٹیموں، جن میں ویسٹ ہیم یونائیٹڈ فاؤنڈیشن اور لوٹن ٹاؤن فاؤنڈیشن شامل ہیں، کے خلاف کھیل کر اپنی صلاحیتوں کا لوہا منوایا۔
پروجیکٹ لیڈ رہان طاہر نے اپنے جذبات کا اظہار کرتے ہوئے کہا: “یہ بچے پاکستان کا مستقبل ہیں۔ ان کا یہ سفر ان ہزاروں بچوں کے لیے امید کا پیغام ہے جو چائلڈ لیبر جیسے مسائل میں پھنسے ہوئے ہیں۔ فٹبال نے انہیں بڑے خواب دیکھنے اور اپنی زندگی بدلنے کا موقع دیا ہے۔”
یہ سب کچھ مسلم ہینڈز کی کاوشوں سے ممکن ہوا ہے جو ان بچوں کو کھیلنے کا حق، خواب دیکھنے کا حق اور تعلیم حاصل کرنے کا حق فراہم کر رہا ہے۔ یہ دورہ ثابت کرتا ہے کہ اگر صحیح پلیٹ فارم دیا جائے تو یہ بچے بھی بین الاقوامی سطح پر پہچان بنا سکتے ہیں اور اپنے جیسے دیگر بچوں کے لیے مثال قائم کر سکتے ہیں۔
مزید یہ بھی پڑھیں:چینی کمپنی کا پاکستان میں الیکٹرک گاڑیوں کا پلانٹ لگانے کا اعلان
