اسلام آباد: محکمہ موسمیات کا کہنا ہے کہ جمعرات کو ملک کے بیشتر میدانی علاقوں میں موسم گرم اور شدید حبس برقرار رہنے کا امکان ہے تاہم آزادکشمیر ،شمال مشرقی پنجاب، اسلام آباد، خطہ پوٹھوہار، بالائی خیبر پختونخوااور گلگت بلتستان میں مطلع جزوی ابرآلود رہنے کے علاوہ چند مقامات پر تیز ہواؤں اور گرج چمک کے ساتھ بارش کا امکان ہے۔
اس دوران آزادکشمیر بالائی خیبر پختونخوااور ملحقہ پہاڑی علاقوں میں چند مقامات پر موسلادھار بارش ہو سکتی ہے۔
صوبہ سندھ کے بیشتر اضلاع مین جمعرات کو موسم گرم اور شدید حبس رہنے کا امکان ہے، تاہم سکھر،گھوٹگی،کشمور، دادو، تھرپارکر، ٹھٹھہ اور کراچی میں مطلع جزوی ابرآلود رہنے کے علاوہ بارش کا امکان ہے۔
جمعرات کو صوبہ پنجاب کے بیشتر اضلاع میں موسم گرم اور شدید حبس برقرار رہنے کا امکان ہے، تاہم راولپنڈی، مری، جہلم، اٹک، چکوال، گجرات اور گوجرانوالہ میں مطلع جزوی ابرآلود رہنے کے علاوہ تیز ہواؤں اور گرج چمک کے ساتھ بارش کی توقع ہے۔
اسی طرح سیالکوٹ، نارووال، شیخوپورہ، حافظ آباد، لاہور، قصور، اوکاڑہ، ساہیوال، فیصل آباد، جھنگ، سرگودھا، خوشاب، ڈی جی خان، ملتان اور بہاولپور میں بھی مطلع جزوی ابرآلود رہنےکے علاوہ تیز ہواؤں اور گرج چمک کے ساتھ بارش کا امکان ظاہر کیا گیا ہے۔
بلوچستان میں جمعرات کو بیشتر اضلاع میں موسم گرم اور مرطوب رہنے کا امکان ہے، تاہم ژوب، موسیٰ خیل، بارکھان، خضدار اور لسبیلہ میں مطلع جزوی ابرآلود رہنے کے علاوہ چند مقامات پر بارش کی توقع ہے۔
گذشتہ 24 گھنٹوں کے دوران مظفرآباد میں ایئرپورٹ سٹی کے علاقے میں 13 ملی میٹر، کوٹلی میں 13 ملی میٹر، راولا کوٹ میں 10 جبکہ گڑھی دوپٹہ میں 5 ملی میٹر بارش ہوئی۔
خیبر پختونخوا میں سب سے زیادہ بارش مالم جبہ میں 36 ملی میٹر، بالاکوٹ میں 17 اور کاکول میں 7 ملی میٹر ریکارڈ کی گئی۔
اسی طرح پنجاب کے سیاحتی مقام مری میں 9 ملی میٹر، اسلام آباد کے علاقے سیدپور میں 8، جبکہ گولڑہ میں 1 ملی میٹر بارش ریکارڈ کی گئی۔
راولپنڈی میں شمس آباد اور چکلالہ میں 1، 1 ملی میٹر جبکہ سندھ کے شہر شہید بے نظیرآباد میں 4 ملی میٹر بارش ریکارڈ ہوئی۔
بدھ کو زیادہ سے زیادہ درجہ حرارت دالبندین اور چلاس میں 44 جبکہ نوکنڈی میں 43 ڈگری سینٹی گریڈ ریکارڈ کیا گیا۔
