حکومتِ آزاد کشمیر نے گزشتہ دورِ حکومت کی جانب سے بلدیاتی ادارہ جات کے ریٹائرڈ ملازمین کی پنشن سے متعلق جاری کردہ نوٹیفکیشن میں اہم ترمیم کرتے ہوئے اس کی کابینہ سے منظوری دے دی ہے۔ اس فیصلے کے تحت پنشن فنڈز میں درپیش کمی کا مسئلہ حل کر دیا گیا ہے اور اب متعلقہ فنڈز کی کمی کا ازالہ حکومتِ آزاد کشمیر خود کرے گی، جس کے بعد اس دیرینہ مسئلے کو مستقل بنیادوں پر حل کر دیا گیا ہے۔
اس اہم اور عوامی نوعیت کے فیصلے کے بعد تنظیم لوکل کونسل ایمپلائز ایسوسی ایشن آزاد کشمیر کی مرکزی قیادت اور بلدیاتی ملازمین کے نمائندوں نے حکومتِ آزاد کشمیر اور پوری کابینہ کا پرخلوص انداز میں شکریہ ادا کیا ہے۔ نمائندوں کا کہنا ہے کہ موجودہ حکومت کی قیادت میں بلدیاتی ملازمین کے دیرینہ اور اہم ترین مسئلے کو مستقل بنیادوں پر حل کرنے کی جانب ایک بڑا قدم اٹھایا گیا ہے۔
بلدیاتی نمائندوں اور یونین قیادت کا ردِعمل:
اس فیصلے کا خیرمقدم کرنے والوں میں تنظیم لوکل کونسل ایمپلائز ایسوسی ایشن آزاد کشمیر کے مرکزی صدر شیخ طاہر وسیم، چیئرمین جاوید اعوان، سینیئر نائب صدر منظور نظامی، ورکر یونین کے صدر چوہدری راحیل شریف، سردار جنید پرویز، ورکر یونین کے جنرل سیکرٹری افتخار احمد، نگرانِ اعلیٰ ندیم میر، فراز اعوان، صائم فرخ اور دیگر نمائندگان شامل ہیں۔
ان تمام رہنماؤں نے اپنے مشترکہ بیان میں حکومتِ آزاد کشمیر کے اس اقدام کا خیرمقدم کیا۔ انہوں نے بتایا کہ ماضی کے نوٹفکیشن کے باعث بلدیاتی ادارہ جات کے ریٹائرڈ ملازمین کی پنشن کی ادائیگی کے لیے فنڈز میں مسلسل کمی واقع ہو رہی تھی، تاہم اب کی جانے والی نئی ترمیم کے تحت پنشن فنڈز میں پیدا ہونے والی کسی بھی قسم کی کمی کو حکومتِ آزاد کشمیر خود پورا کرے گی اور رقم ادا کرے گی۔
یہ بھی پڑھیں: قانونی تقاضے پورے نہ کرنے والے کو پنشن کا حقدار قرار نہیں دیا جاسکتا، وفاقی آئینی عدالت
وزیراعظم بیرسٹر افتخار گیلانی اور کابینہ کا شکریہ:
تنظیم کے عہدیداروں نے اس بات پر زور دیا کہ موجودہ وزیراعظم بیرسٹر افتخار گیلانی کی قیادت میں کابینہ نے اس ترمیم کی منظوری دے کر پنشن کے اس اہم معاملے کو مستقل بنیادوں پر سمیٹا اور حل کیا ہے۔ انہوں نے اس فیصلے کو موجودہ حکومت کی جانب سے ایک بڑا اور تاریخ ساز کارنامہ قرار دیتے ہوئے وزیراعظم آزاد کشمیر بیرسٹر افتخار گیلانی سمیت تمام ممبرانِ کابینہ کا دلی طور پر شکریہ ادا کیا۔
رہنماؤں نے کہا کہ اس عوامی اور ملازم دوست فیصلے کے باعث نہ صرف بلدیاتی ادارہ جات کے موجودہ ملازمین اور ریٹائرڈ پنشنرز میں خوشی کی لہر دوڑ گئی ہے بلکہ ان کے حوصلوں کو بھی بے پناہ تقویت ملی ہے۔
بلدیاتی ملازمین سے فرائض کی احسن کیلیے اپیل:
ایسوسی ایشن کی قیادت نے اس موقع پر آزاد کشمیر بھر کے تمام بلدیاتی ملازمین سے بھی ایک پرزور اپیل کی ہے۔ انہوں نے کہا کہ ملازمین اب اپنے تمام تر فرائض کو بطریقِ احسن اور پوری ایمانداری سے انجام دیں۔
انہوں نے اس بات پر بھی زور دیا کہ تمام ملازمین اپنی ذمہ داریاں احسن انداز میں نبھائیں تاکہ شہروں اور گلی محلوں میں رہنے والے عام شہریوں کی مشکلات کا بروقت اور موثر ازالہ ممکن ہو سکے اور عوامی خدمات کی فراہمی کو یقینی بنایا جا سکے۔
