مظفرآباد: آزادکشمیر حکومت نے یکم جولائی 2025 سے ریٹائرڈملازمین کیلئے پنشن اورتمام سول ملازمین بشمول کنٹریکٹ ملازمین کی تنخواہوں میں ایڈہاک ریلیف کے طورپر اضافے کا نوٹیفکیشن جاری کردیا ہے۔
محکمہ خزانہ کی جانب سے جاری کردہ نوٹیفکیشن میں کہا گیا ہے کہ تمام سول اورفوجی پنشنرز کو پنشن میں 7 فیصد اضافہ دیا جائے گا۔
نوٹیفکیشن میں مزید کہا گیا کہ پنشن میں اضافہ ان پنشنرز کیلئے بھی قابل قبول ہوگا جو یکم جولائی 2025 کو یا اس کے بعد ریٹائر ہوں گے۔
اضافہ فیملی پنشن، ہمدردی الاؤنس اور غیر معمولی پنشن پر بھی قابل قبول ہوگا جبکہ یہ اضافہ خصوصی اضافی پنشن پر قابل قبول نہیں ہوگا جو ریٹائرمنٹ سے پہلے کے آرڈرلی الاؤنس اور ڈرائیور کی تنخواہ یا وقتاً فوقتاً منظور شدہ آرڈر کے بدلے میں اجازت دی گئی ہے۔
محکمہ خزانہ کی جانب سے جاری ایک اور نوٹیفکیشن میں جملہ ملازمین کیلئے ایڈہاک ریلیف الاؤنس میں 10 فیصد اضافے کی منظوری دی گئی ہے جو تمام سول ملازمین بشمول کنٹریکٹ ملازمین پر لاگو ہوگا۔
یہ بھی پڑھیں: پی ڈی اے ملازمین تنخواہوں کی عدم فراہمی کیخلاف سراپا احتجاج،دھرنا دیدیا
نوٹیفکیشن میں مزید کہا گیا ہے کہ اضافہ انکم ٹیکس سے مشروط ہوگا اور یہ چھٹی اور ریٹائرمنٹ (LPR) کی چھٹی کی پوری مدت کے دوران قابل قبول ہوگا۔
تنخواہ میں اضافہ بیرون ملک تعیناتی/ ڈیپوٹیشن کے دوران ملازمین کے لیے یہ قابل قبول نہیں ہوگا،تنخواہوں میں ایڈہاک ریلیف کو پنشن/گریچوٹی کے حساب کتاب اور مکان کے کرائے کی وصولی کیلئے اجرت کے حصے کے طور پر نہیں سمجھا جائے گا۔
نوٹیفکیشن میں مزید کہا گیا ہے کہ ایڈہاک ریلیف الاؤنس کو متعلقہ سیکرٹریٹ/محکموں کی طرف سے مالی سال 2025-26 کے بجٹ میں مختص کیا جائے گا اور کوئی سپلیمنٹری گرانٹ فراہم نہیں کی جائے گی۔
یاد رہے کہ یہ اضافہ ملازمین کو یکم اگست کوملنے والی تنخواہ اور پنشن میں ملے گا۔
