میرپور:میرپور پولیس نے بین الاقوامی ڈرگ سمگلر ز کا نیٹ ورک ٹریس کرتے ہوئے مرکزی ملزم ارشد بلو سمیت 10ملزمان کو گرفتارکر لیا، مختلف مقدمات میں 4کلو سے زائد ہیروئن برآمد کر لی گئی۔
کرنسی ایکس چینج سیل،1کروڑ سے زائد ملکی و غیر ملکی کرنسی ،اسلحہ برآمد، 77سے زائد کھاتہ رجسٹر اور دیگر اہم دستاویزت سمیت ملزمان کے زیر استعمال 5گاڑیاں بھی ضبط کر لی گئیں۔
ایس ایس پی میرپور خاور علی شوکت نے پولیس افسران کے ہمراہ ایس ایس پی آفس میں میڈیا بریفنگ دیتے ہوئے بتایا کہ میرپور میں 2015سے راجہ ارشد عرف بلو بین الاقوامی منشیات کانیٹ ورک چلا رہاتھا
ملزمان کے پی کے، آزادکشمیر اور اسلام آباد سے ہیروئین پارسل اور دیگر ذرائع سے برطانیہ سمگل کرتے رہے، ارشد بلو کے خلاف 2013میں برطانیہ میں ہیروئن سمگلنگ پر مقدمہ درج ہوا جس میں اس کا ساتھی قیصر بھی شامل تھا جسے برطانوی عدالت نے7 سال سزا سنائی۔
گرفتاری کے چند ماہ بعد ارشد بلو برطانیہ میں ضمانت پر رہا ہوا اور پھر وہاں سے فرار ہو کر پا کستان آ گیا، 2015میں ارشد بلو نے منشیات سمگلنگ کیلئے نیٹ ورک تشکیل دیا جس میں راجہ فیصل، عظیم، ندیم، حسن رئوف اور دیگر افراد نے ہیروئن برطانیہ سمگل کرنا شروع کی۔
یہ ملزمان ہیروئن بذریعہ کوریئر برطانیہ سمگل کرنے پر میرپور میں گرفتار رہے اور ان پرمیرپور کے مختلف تھانوں میں متعدد مقدمات درج ہیں۔
ایس ایس پی میرپورخاور علی شوکت نے بتا یا کہ میرپور پولیس نے ستمبر 2024میں اس نیٹ ورک پر کام شروع کیا اور اس نیٹ ورک کے سرغنہ ارشد بلو کے قریبی ساتھیوں پر خفیہ نگرانی شروع کی۔ نومبر2024میں دھانگلی ڈڈیال پر ملزمان جنید اور وقار سے ہیروئن برآمد ہوئی۔
تفتیش کے دوران ملزمان نے انکشاف کیا کہ وہ ارشد بلو کے بین الاقوامی ڈرگ نیٹ ورک کا حصہ ہیں اوریہ ہیروئین ارشد بلو اوراس کے ساتھی احتشام راجہ ساکن برٹلہ چڑھوئی برطانیہ سمگل کرتے ہیں۔
بین الاقوامی ڈرگ نیٹ ورک کے مرکزی ملزم ارشد بلو کو میرپورسے گرفتار کیا گیا۔ ارشد بلو نے دوران تفتیش بتایا کہ وہ 2019سے احتشام راجہ کے ساتھ کام کر رہا ہے اور منشیات برطانیہ سمگل کررہے ہیں ۔
ڈرگ نیٹ ورک میں خان وحید اور توقیر بھی شامل ہیں جن سے مختلف اوقات میں کروڑوں روپے پاکستانی کرنسی وصول کیں۔ ملزم ارشد بلو کے بنک ریکارڈ کی پڑتال سے معلوم ہوا کہ ایک نجی بینک اکاونٹ میں 6کروڑ سے زائد رقم جمع کروائی گئی۔
تفتیشی ٹیم نے 100سے زائد مشکوک بینک ٹرازیکشنز کے ریکارڈ کے لیے متعلقہ بنک سے رابطہ کرلیا ہے۔ ملزم ارشد بلو کی نشاندہی پر پولیس نے ڈرگ نیٹ ورک کے اہم رکن خان وحید کے ملکیتی نیلم کرنسی پر کارروائی کرتے ہوئے لاکھوں روپے ملکی و غیر ملکی کرنسی برآمد کی جبکہ گھر پر کاتروائی کرتے ہوئے ملزم توقیر سے ڈرگ منی25لاکھ روپے اور دیگر ملکی و غیر ملکی کرنسی برآمد کی۔
ملزم توقیر کے قبضے سے اسلحہ رائفل 222بور، رپیٹر پمپ ایکشن 12بور،2عدد 44بور رائفلز، 8mmرائفل، 3عدد 30بور پستول، 22بور پستول، 9mmپستول، 30بور موذر،خنجر، 16میگزینز اور گولیاں، 10موبائل فونز، لیپ ٹیپ، ٹیب اور دیگر سامان اور اہم دستاویزات برآمد کی گئی۔
اس کے علاوہ 77سے زائد کھاتہ رجسٹر اور ملزمان کے زیر استعمال 5گاڑیاں بھی ضبط کر لی گئیں۔ کیش ریکارڈ کھاتوں کی پڑتال جاری ہے۔ ضبط شدہ ایک کیش رجسٹر سے معلوم ہوا کہ نیلم کرنسی کے مالک ملزم خان وحید اور ملزم توقیر نے مرکزی ملزم ارشد بلو کو کیش ادائیگیاں کیں جن کا اندراج موجود ہے۔
ایک رجسٹر پر موجود ریکارڈ کے مطابق ملزم ارشد بلو کو 50لاکھ50ہزار، 25لاکھ، 21لاکھ 30ہزار، 7لاکھ 90ہزار، 5لاکھ پاکستانی روپے کی مختلف اوقات میں ادائیگی کی گئی جبکہ دیگر 77سے زائد کیش ریکارڈ رجسٹرز کی پڑتال جاری ہے۔
ایس ایس پی میرپور خاور علی شوکت نے مزید بتایا کہ ابتدائی تفتیش میں یہ حقائق سامنے آئے ہیں کہ یہ نیٹ ورک برطانیہ، پاکستان اور آزادکشمیر کے علاقوں تک پھیلا ہوا ہے۔ یہ کیس ہائی پروفائل کیس ہے اور اس حوالے سے برطانیہ اور انٹر پول سے رابطے میں ہیں۔
یہ بھی پڑھیں: ارشد بلو کیس میں اہم پیشرفت،1کروڑ سے زائدملکی وغیر ملکی کرنسی برآمد،نیلم کرنسی ایکسچینج سیل،کیشیئر سمیت 4 افراد گرفتار
