کوٹلی( کشمیر ڈیجیٹل)پاک فوج کے زیراہتمام کوٹلی میں سوشل میڈیا ایکٹوسٹ، میڈیا نمائندگان کیلئے آگاہی پروگرام کا انعقاد کیا گیا،کور کمانڈر راولپنڈی نے اس معلوماتی سیشن میں بطور خاص شرکت کی اور شرکاء کو آگاہی لیکچر دیا۔
آئی ایس پی آر کے مطابق کور کمانڈر راولپنڈی نے شرکاء سے خطاب کرتے ہوئے کہا کہ دشمن عناصر سوشل میڈیا کے ذریعے نوجوان نسل کے ذہنوں کو منفی پروپیگنڈے سے متاثر کرنے کی کوشش کر رہے ہیں۔
انہوں نے اس بات پر زور دیا کہ معاشرے میں تبدیلی جبری اقدار کے ذریعے نہیں بلکہ لگن اور قومی اتحاد کے ذریعے حاصل کی جاسکتی ہے اور اس تبدیلی کو زیادہ سے زیادہ اتحاد اور خوشحالی کی طرف لے جانا چاہئے۔
ہمیں اپنی تاریخ، بے لوث قربانیوں اور ان واقعات کو نہیں بھولنا چاہیے جہاں ہم ہمیشہ ایک دوسرے کے شانہ بشانہ کھڑے رہے۔
نوجوان سوشل میڈیا پر پھیلائی جانے والی خبروں کی مکمل تحقیق کے بغیر ان پر یقین نہ کریں۔ جھوٹی معلومات قوم کے استحکام اور یکجہتی کو نقصان پہنچا سکتی ہیں۔
نوجوانوں کو چاہیے کہ وہ سوشل میڈیا کا مثبت استعمال کرتے ہوئے مظلوم کشمیریوں کی آواز اجاگر کریں۔
حقائق کے خلاف مختلف غلط تصورات کی وضاحت کرتے ہوئے انہوں نے تمام فریقوں پر زور دیا کہ وہ قوم کی تعمیر میں اپنا مثبت کردار ادا کریں۔
شرکاء پروگرام نے کور کمانڈر راولپنڈی کی جانب سے دئیے گئے آگاہی لیکچر کو انتہائی مفید قرار دیتے ہوئے کہا کہ اس انہیں بہت کچھ سیکھنے کا موقع ملا۔
شرکاء نے مطالبہ کیا کہ دور حاضر میں ملک کو درپیش مس انفارمیشن کے چیلنجز سے عوام کی آگاہی کیلئے مستقبل میں بھی اس طرح کے ایونٹس کے انعقاد کیا جائے۔
کشمیری قومی اداروں کیساتھ کھڑے ہو کر دشمن قوتوں کا مقابلہ کریں، کورکمانڈر راولپنڈی
پاک فوج کے زیر اہتمام آزاد کشمیر کے ضلع کوٹلی میں ریٹائرڈ فوجیوں کی فلاح و بہبود کیلئے پروگرام کا انعقادبھی کیا گیا جس میں کور کمانڈر راولپنڈی نے خصوصی شرکت کی ،تقریب میں سیکڑوں کی تعداد میں ریٹائرڈ فوجیوں نے شرکت کی ۔
آئی ایس پی آر کے مطابق تقریب سے خطاب کرتے ہوئے کور کمانڈر راولپنڈی نے کہا کہ وطن عزیز پاکستان امت مسلمہ کی امیدوں کا مرکز ہے۔
دشمن قوتیں پاکستان کو کمزور کرنیکی سازشوں میں مصروف ہے ، ہم سب کو مل کر اس ملک کی مضبوطی کیلئے کردار ادا کرنا ہو گا۔
یہ پاکستانی اور کشمیری قوم کی اجتماعی ذمہ داری ہے کہ اپنے قومی اداروں کے ساتھ پوری قوت کے ساتھ کھڑے ہو کر دشمن قوتوں کا مقابلہ کریں۔
انہوں نے کہا کہ دشمن کے آلہ کار سوشل میڈیا پر منفی پروپیگنڈے کر کے نوجوان نسل کے ذہنوں کو آلودہ کر رہے ہیں۔ نوجوان سوشل میڈیا کا مثبت استعمال کرتے ہوئے ملکی مفاد اور مظلوم کشمیریوں کی آواز اجاگر کریں۔
اس موقع نے کور کمانڈر راولپنڈی نے سابقہ فوجیوں کے مسائل سنے اور حل کیلئے احکامات دئیے۔
سابقہ فوجیوں نے اس بہترین پروگرام کو ویٹرن کمیونٹی کے ساتھ تعلقات کو مزید مضبوط کرنے اور انکی فلاح وبہبود کے لیے سنگ میل قرار دیا ۔
ویٹرنز نے اس کامیاب پروگرام کے انعقاد پر پاک فوج کا شکریہ ادا کیا اور مستقبل میں بھی اسطرح کے پروگرامز کی خواہش کا اظہار کیا۔
